په اندونیزیا کې د مسافر وړونکي بس د ټکر له امله لږ تر لږه ۱۶ کسانو ژوند د لاسه ورکړی دی .
ګڼ شمېر قربانیان د درملنې لپاره د سمارنګ ښار ته لېږدول شوي دي.
یو ژغورونکي ویلي، چې د دوشنبې په لومړیو ساعتونو کې د اندونیزیا پر لویه لار یو مسافر وړونکی بس له خنډ سره وجنګېد او چپه شو، چې له امله یې لږ تر لږه ۱۶ کسانو خپل ژوند له لاسه ورکړ.
د سیمه ییزې ژغورنې او پلټنې ادارې مشر، بودیونو، په یوه بیان کې ویلي، چې بس له پلازمېنې جاکارتا څخه یوګیاکارتا ته روان و او کله چې د لویې لارې یوې دورې ته ورسېد، په "خورا ګړندي" سرعت روان و.
بس د سړک له خنډ سره تر ټکر وروسته چپه شو.
بودیونو، چې په یوه نوم یادېږي، وویل: "موږ ۳۴ کسان ایستلي دي."
هغه زیاته کړه، چې ۱۵ کسان په سیمه کې مړه اعلان شول، په داسې حال کې چې یو بل کس په روغتون کې ساه ورکړه.
د دغې ادارې له خوا په خپرو شویو ویډیويي انځورونو کې ژغورونکي ښکاري، چې د یوه قرباني جسد په کڅوړه کې اچوي، په داسې حال کې چې بس نږدې په یوه اړخ پروت دی.
په اندونیزیا کې، چې د سویل ختیځې اسیا یو پراخ ټاپوګانو ټولګه ده، د ترانسپورتي پېښې عامې دي، چېرې چې ډېری وختونه موټر زاړه او په سمه توګه نه ساتل کېږي او د سړک قوانین په منظمه توګه تر پښو لاندې کېږي.
په ۲۰۲۴ کال کې، کله چې خلک د کوچني اختر لمانځلو لپاره په سفر وو، پر یوې ګڼې ګوڼې ډکې لویې لارې د یوه موټر د بس او یوه بل موټر سره د ټکر له امله لږ تر لږه ۱۲ کسان ووژل شول.
او په ۲۰۱۹ کال کې، د سوماترا په لوېدیځه ټاپو کې د یوه بس د کندې ته د لوېدو له امله لږ تر لږه ۳۵ کسان مړه شوي وو..
