د دولتي رسنیو په وینا، شمالي کوریا د دې اونۍ په ترڅ کې د یوې نوې جنګي بېړۍ د پرانیستې پر مهال د پېښې په اړه پلټنې پیل کړې دي.

شمالي کوریا د پنجشنبې په ورځ وویل چې "د چهارشنبې د ورځې د نوې جوړې شوې ۵۰۰۰ ټنه سمندري ویجاړونکې بېړۍ د پرانیستې په مراسمو کې یوه جدي پېښه رامنځته شوه"، چې په ترڅ کې د بېړۍ لاندې برخې زیانمنې شوې، او مشر کیم جونګ اون دغه پېښه "یو جنایي عمل" وباله.

د سویلي کوریا پوځ وویل چې د امریکا او سیول استخباراتي چارواکو ارزونه کړې چې د شمالي کوریا د بېړۍ "د اړخ پرانیستې هڅه" ناکامه شوې، او بېړۍ په اوبو کې کږه پاتې شوې ده.

خو د شمالي کوریا رسمي خبري اژانس کورین سنټرل نیوز ایجنسۍ (KCNA) د جمعې په ورځ وویل چې د جنګي بېړۍ د اوبو لاندې او داخلي پلټنې تایید کړه چې د لومړني اعلان خلاف، د بېړۍ په لاندې برخه کې کوم سوري نه دي جوړ شوي.

د KCNA په وینا، "د بېړۍ ښي اړخ خراش شوی و، او د ژغورنې د چینل له لارې د بېړۍ شا برخې ته یو څه اندازه سمندري اوبه ننوتلې وې."

جنایي عمل

شمالي کوریا د پنجشنبې په ورځ د بېړۍ د ناکامې پرانیستې پړه "بې تجربې قوماندې او د عملیاتو بې احتیاطۍ" باندې واچوله، چې د کیم په شتون کې ترسره شوه، او هغه یې "د مطلقې بې احتیاطۍ له امله یو جنایي عمل" وباله.

د KCNA په وینا، د ختیځ بندري ښار چونګجین د بېړۍ جوړولو د فابریکې مدیر، هونګ کیل هو، د پنجشنبې په ورځ د قانون پلي کوونکو لخوا احضار شو.

راپور زیاتوي چې کارپوهانو اټکل کړی چې "د بېړۍ د سیلاب شوې برخې څخه د اوبو د ایستلو لپاره به دوه یا درې ورځې وخت ونیسي ترڅو د بېړۍ توازن وساتل شي."

راپور همدارنګه وايي چې د بېړۍ اړخ د بیا رغولو لپاره به شاوخوا لس ورځې وخت ونیسي.

د سویلي کوریا پوځ وویل چې د دې نوې جوړې شوې جنګي بېړۍ اندازه او کچه د ۵۰۰۰ ټنه ویجاړونکې بېړۍ، چې د تېرې میاشتې په ترڅ کې د شمالي کوریا لخوا ښکاره شوې وه، سره ورته ښکاري.

شمالي کوریا ادعا کړې چې چوی هیون "تر ټولو ځواکمنو وسلو" سره سمبال شوې ده او دا به "د راتلونکي کال په پیل کې په عملیاتو کې شامله شي."