اسرائیل په اشغال شوي ختیځ بیت المقدس کې د ملګرو ملتونو د ادارې په مرکزي دفتر کې ودانۍ ونړولې
اسرائیلي ځواکونه او یو ښي اړخه وزیر د شیخ جراح په ګاونډ کې د UNRWA مرکزي دفتر ته ننوتل، ودانۍ یې ونړولې او د اسرائیلو بیرغ یې پورته کړ.
د عیني شاهدانو په وینا، د اسرائیلو ځواکونو او د دغه هېواد د ملي امنیت توندلاري ښي اړخي وزیر بن ګویر د سه شنبې په ورځ په اشغال شوي ختیځ بیت المقدس کې د فلسطیني کډوالو لپاره د ملګرو ملتونو د ادارې (UNRWA) تړل شوي مرکزي دفتر ته ورننوتل او هلته یې ودانۍ ونړولې.
شاهدانو د انادولو خبري اژانس ته وویل اسرائیلي ډلې، چې لږ تر لږه یو بلډوزر ورسره مل و، د شیخ جراح په سیمه کې موقعیت لرونکي دې مرکز ته ننوتلې او په دغه ځای کې یې ګرځنده او دايمي ودانۍ ونړولې.
شاهدانو زیاته کړه چې اسرائیلي ځواکونو د ملګرو ملتونو بیرغ ښکته کړ او پر ځای یې د اسرائیل بیرغ پورته کړ.
د (UNRWA) ویاند جاناتن فاولر د (AFP) خبري اژانس ته په یوه بیان کې وویل چې اسرائیلي ځواکونه د سهار له اوو بجو لږ وروسته دغه مرکز ته «په زور ورننوتل».
هغه زیاته کړه: «دا پر UNRWA او د هغې پر تاسیساتو یو بې ساری برید دی، او همدارنګه د نړیوالو قوانینو او د ملګرو ملتونو د امتیازاتو او مصونیتونو جدي سرغړونه هم ده.»
د بیت المقدس د ښاروال مرستیال اسرائیلي چارواکي آریه کینګ، د امریکا پر ټولنیز رسنیز پلیټ فارم ایکس په یوه پوسټ کې UNRWA «نازي» وبلله او ویې ویل چې له اعتراضونو او فشار وروسته اوس له بیت المقدس څخه د دې ادارې د ایستلو بهیر پیل شوی دی.
