د پاکستان یوې مهمې ناقانونه وسله والې ډلې، چې د ګڼو وسله والو او بمي بریدونو مسوولیت ور په غاړه دی، د پنجشنبې په سهار د کوچني اختر په مناسبت درې ورځنی اوربند اعلان کړ. دا اعلان څو ساعته وروسته تر هغه وشو چې پاکستان او افغانستان هم د روانو نښتو د موقتي درولو خبر ورکړ. د فبرورۍ له وروستیو راهیسې، کله چې د دواړو هیوادونو ترمنځ نښتې پیل شوې وې، دا لومړی ځل دی چې د ډزو د بندیدو راپور ورکول کیږي.

د تحریک طالبان پاکستان (TTP) ویاند محمد خراساني وویل، د اوربند موخه دا ده چې خلک وکولی شي د روژې د مبارکې میاشتې په پای کې کوچنی اختر ولمانځي.

ټي ټي پي (TTP)، چې له افغان طالبانو جلا خو د هغوی متحد ګڼل کیږي، په ۲۰۲۱ کال کې په افغانستان کې د طالبانو له بیا واکمنیدو وروسته په پاکستان کې خپلو بریدونو ته زور ورکړی دی. امریکا متحده ایالاتو او ملګرو ملتونو دا ډله د یوې ترهګرې ډلې په توګه نومولې ده. پاکستان د افغانستان پر طالبانو تور پورې کوي چې د ټي ټي پي مشرانو او زرګونو غړو ته یې پناه ورکړې چې له هغه ځایه پر پاکستان بریدونه کوي، خو کابل دا تورونه ردوي.

یادې ډلې ویلي چې اوربند به د اختر له لومړۍ ورځې څخه پیل شي، چې تمه کیږي په پاکستان کې به (د میاشتې لیدلو ته په کتو) د جمعې په ورځ وي.

پاکستان او افغانستان د چهارشنبې په ورځ اعلان وکړ چې دوی پلان لري د دوشنبې تر شپې پورې جګړه ودروي. دواړو لوریو ویلي چې دا اوربند د سعودي عربستان، تورکیې او قطر په غوښتنه شوی دی. دغو دریو هیوادونو د فبرورۍ په میاشت کې د دواړو هیوادونو ترمنځ د نښتو له بیا پیلیدو راهیسې د منځګړیتوب هڅې کولې؛ دوی تر دې وړاندې د اکتوبر په میاشت کې هم د یو بل اوربند په رامنځته کولو کې مرسته کړې وه.

دا اعلانونه په کابل کې د هغو قربانیانو له ډله ییزې جنازې وروسته وشول چې د روانې اونۍ په پیل کې په کابل کې د نشه يي توکو د روږدو کسانو د درملنې پر یوه مرکز د پاکستان په برید کې وژل شوي وو. د طالبانو حکومت چارواکو ویلي چې په دغه برید کې ۴۰۸ کسان وژل شوي او ۲۶۵ نور ټپیان دي، که څه هم دا شمیرې په خپلواکه توګه نه دي تایید شوې.

د پاکستان د اطلاعاتو وزیر عطاء الله تارړ د چهارشنبې په ورځ وویل چې پوځ هیڅ روغتون نه دی په نښه کړی او په کابل کې بریدونه د وسلو پر یوه ډیپو شوي وو. تارړ له کابل سره د جګړې د موقت ځنډولو اعلان هم وکړ.