د ټرمپ یو تن سلاکار د کودتا په تور د  هیلري کلنټن او د اوباما د دورې ځینې چارواکو د محاکمه کولو غوښتنه وکړه.

د سپینې ماڼۍ د عمومي سکرتر مرستیال  سټیفن میلر غوښتنه کړې چې د بهرنیو چارو پخوانۍ وزیره هیلري کلنټن او د اوباما ادارې ځینې چارواکي دې د ولسمشر ډونالډ ټرمپ پر وړاندې د روسیې د تحقیقاتو له لارې د "کودتا" په تور محاکمه شي.

میلر د یکشنبې په ورځ فوکس نیوز ته وویل: "د ولسمشر ټرمپ پر وړاندې د روسیې د همکارۍ جعلي تورونه د دې هېواد په تاریخ کې تر ټولو لوی دروغ دي. دا یوه کودتا وه چې د هېواد د استخباراتي ادارو، ژور دولت او دیموکرات ګوند لخوا ترسره شوه."

میلر ادعا وکړه چې نوي استخباراتي معلومات د دې موضوع په اړه شکونه له منځه وړي او وویل چې دا تورونه د "امریکا پر وړاندې د خیانت دسیسې ټولې قانوني برخې پوره کوي." هغه د CIA پخوانی مشر جان برینن، د FBI پخوانی مشر جیمز کومي، د کالیفورنیا سناتور ادم شیف، هیلري کلنټن او نور تورن کړل چې په شعوري ډول یې دغه دسیسه جوړه کړې وه.

میلر وویل: "هر یو فرد چې په دې کې ښکېل دی، اوس د دې دسیسې برخه دی." هغه زیاته کړه: "اوس د حساب ورکولو وخت دی ترڅو موږ خپله ډیموکراسي بېرته ترلاسه کړو."

کله چې د پایلو په اړه وپوښتل شو، میلر ډاډ څرګند کړ چې د عدلیې وزارت به "دا حقایق تعقیب کړي او ټول اړین قانوني ګامونه به پورته کړي."

میلر د CIA مشر جان رټکلیف د ارزونې ملاتړ وکړ چې دسیسه لا هم روانه ده ځکه چې ګډونوال "لا هم دا نه مني" او ښایي د محدودیتونو قانون وغځوي.

هغه وویل: "لا هم د ژور دولت د کودتا پلان جوړونکي شته چې هڅه کوي دا معلومات پټ کړي." میلر زیاته کړه: "دا ټول چلند او کړنې په ګډه دا معنا لري چې دسیسه پای ته نه ده رسېدلې او لا هم روانه ده."

ټرمپ د سه شنبې په ورځ پخوانی ولسمشر بارک اوباما تورن کړ چې د هغه پر وړاندې یې د "کودتا" پلان جوړ کړی وو او چارواکو څخه يي غوښتنه وکړه  چې د هغه پر وړاندې اقدام وکړي.

دا څرګندونې هغه مهال وشوې کله چې له ټرمپ څخه د بدنام شوي مالي تمویلونکي جیفري اپسټین او د ماشومانو د قاچاق په تور محکومې ګیسلین مکسویل په اړه پوښتنه وشوه.

د اوباما دفتر د ټرمپ ادعاوې "عجیبه، بې بنسټه" او "د پام اړولو لپاره یوه کمزورې هڅه" وبللې.