د حماس ځواکونو د غزې د هغې 'جنایتکارې ډلې' ۳۲ غړي وژلي چې د مرستندویه توکو په غلا کې یې لاس درلود
د فلسطین مقاومت ډلې ته د امریکا له ولسمشر ډونالډ ټرمپ څخه د داخلي امنیتي عملیاتو لپاره "د ستونزو د هواري" اجازه ورکړل شوې ده.
یوې فلسطیني امنیتي سرچینې د دوشنبې په ورځ رویټرز ته وویل، چې د حماس د فلسطیني مقاومت ډلې ځواکونو د هغو امنیتي عملیاتو په ترڅ کې چې د جمعې په ورځ د اوربند تر پلي کېدو وروسته پیل شول، په غزه ښار کې د یوې "جنایتکارې ډلې" ۳۲ غړي وژلي دي چې د مرستو په غلا کولو لاس درلود. پدې نښتو کې د حماس ۶ تنه غړي هم وژل شوي دي.
دغه چارواکي وویل، دغو امنیتي عملیاتو "په غزه ښار کې له یوې کورنۍ سره تړلې یوه خطرناکه جنایتکاره ډله" په نښه کړې وه. نوموړي وویل، د عملیاتو په پایله کې ۲۴ کسان نیول شوي او ۳۰ نور ټپیان شوي دي.
تر دې مخکې، په پراخه کچه داسې راپورونه ورکړل شوي وو چې اسرائیل په غزه کې د یوې وسله والې ډلې ملاتړ کړی و، ترڅو پر دغه فلسطیني قلمرو د حماس کنټرول کمزوری کړي. دغه ډله د مرستندویه توکو په غلا کې ښکېل وه.
له کله راهیسې چې د اسرائیل د دوه کلنې جګړې اوربند پلی شوی، د غزې د کورنیو چارو وزارت امنیتي ځواکونه ځای پر ځای کړي دي او دا يي د امنیتي تشې د رامنځته کیدو د مخنیوي لپاره یو ګام بللی دی.
که څه هم د امریکا ولسمشر ډونالډ ټرمپ د غزې د جګړې د پای ته رسولو د پلان له مخې له حماس څخه غوښتي چې بې وسلې شي، خو هغه حماس ته د داخلي امنیتي عملیاتو لپاره شین څراغ ورکړی او ویلي یې دي چې هغوی غواړي "ستونزې هوارې کړي" او "موږ هغوی ته د یوې مودې لپاره اجازه ورکړه."
حماس پخوا د یوې جنایتکارې ډلې مشر، یاسر ابو شباب، او د هغه ملاتړي له اسرائیل سره په همکارۍ تورن کړي وو.
د حماس امنیتي چارواکي وویل، چې د ابو شباب یو لوړپوړی مرستیال د اوربند له پیل سره د امنیتي عملیاتو په ترڅ کې "له منځه وړل شوی" او زیاته یې کړه چې د ابو شباب د نیولو لپاره پلټنه روانه ده.
هغه زیاته کړه: "امنیتي عملیات دوام لري او تر هغې به پراخ شي، ترڅو دا مسله په بشپړه توګه پای ته ورسېږي، او هېڅ لوري ته به اجازه ورنه کړل شي چې له قانون څخه سرغړونه وکړي."
