تورکیه پر انجرلیک هوايي اډې خپل حاکمیت تاییدوي او ټینګار کوي چې د ناټو او متحدینو د فعالیتونو په ګډون ټول عملیات د ملي قوانینو او د تورکیې د څارنې لاندې ترسره کېږي.
د تورکیې وسله والو ځواکونو اعلان وکړ چې د انجرلیک هوايي اډه د تورکیې جمهوریت پورې اړوند تاسیسات پاتې شوي او په بشپړه توګه د تورکیې د وسله والو ځواکونو تر کنټرول لاندې ده.

د چهارشنبې په ورځ په خپره شوې اعلامیه کې ویل شوي چې په دغه اډه کې ټول فعالیتونه د ملي قوانینو او د تورکیې د حاکمیت حقونو سره سم ترسره کېږي.

دا اډه چې په اډانا (Adana) ولایت کې موقعیت لري او د تورکیې د هوايي ځواکونو د لسمې اصلي جیټ اډې د قوماندې تر چتر لاندې فعالیت کوي، د اعلامیې له مخې د بېلابېلو هوايي برخو لکه په هوا کې د تېلو د لېږد الوتکو، بریدګرو جیټ الوتکو، عمومي هدف لرونکو هلیکوپټرو او بې پیلوټه الوتکو (ډرون) کوربه توب کوي.

په اعلامیه کې راغلي چې په اډه کې ټول تاسیسات د تورکیې ملکیت دی او ټول عملیات د ملي قوانینو او هغو نړیوالو تړونونو په چوکاټ کې ترسره کېږي چې تورکیه یې غړیتوب لري. دا ټول فعالیتونه د تورکي چارواکو تر څارنې او همغږۍ لاندې پر مخ وړل کېږي.

د انجرلیک هوايي اډې جوړول په ۱۹۵۱ کال کې د ۱۹۴۳ کال د قاهرې د دویم کنفرانس د پرېکړو پر بنسټ پیل شول او په ۱۹۵۴ کال کې بشپړ شول. د اډې عملي کارول د ۱۹۵۴ کال د جون په ۲۳مه د "پوځي تاسیساتو د تړون" له لاسلیک وروسته پیل شول.

په ۱۹۷۴ کال کې د قبرس د سولې د عملیاتو په پایله کې، د امریکا لخوا پر تورکیې د وسلو د بندیزونو له امله په ۱۹۷۵ کال کې د ناټو له عملیاتو پرته د انجرلیک او چیلي (Çiğli) په اډو کې د امریکا ټول پوځي فعالیتونه ودرول شول. وروسته له هغه چې د امریکا کانګرس د ۱۹۷۸ کال په سپټمبر کې دا بندیزونه لیرې کړل، په تورکیه کې د امریکا پوځي فعالیتونه بېرته پیل شول.

په اعلامیه کې دا هم ویل شوي چې د تورکیې او امریکا ترمنځ د پوځي اړیکو حقوقي چوکاټ د ۱۹۸۰ کال د مارچ په ۲۹مه د "دفاعي او اقتصادي همکارۍ تړون" (SEIA) له لارې بیا ترتیب شو؛ دغه تړون د پوځي تاسیساتو د پخواني تړون ځای ونیوه او د اډې د کارولو شرایط یې وټاکل.

په اعلامیه کې ټینګار شوی چې د انجرلیک هوايي اډه کولی شي د ناټو د ماموریتونو، دوه اړخیزو تړونونو او د ملګرو ملتونو د امنیت شورا د عملیاتو ملاتړ وکړي؛ ټول امنیت او عمومي کنټرول د تورکي چارواکو په واک کې دی، او د هر ډول بهرني پرسونل، تجهیزاتو یا تاسیساتو کارول د تورکي چارواکو په خبرتیا او اجازې سره ترسره کېږي.

سربېره پردې، د ناټو او دوه اړخیزو تړونونو په چوکاټ کې د امریکا، اسپانیا، پولنډ او قطر پوځي پرسونل په انجرلیک کې ځای پر ځای شوي، چې دا پرسونل د هوايي دفاع، مخابراتي ملاتړ او د جنګي خدمتونو د ملاتړ په څېر دندې ترسره کوي.