نیویارک ټایمز: په وینزویلا کې د امریکا پوځي مداخلې د ټرمپ ملاتړي په دوو برخو ویشي

په وینزویلا کې د امریکا پوځي مداخلې، د ولسمشر ډونالډ ټرمپ د یو شمېر ملاتړو له خوا په تود هرکلي سره مخ شوې، خو ځینې نورې کړۍ بیا دا ګام تر پوښتنې لاندې راولي.

د نیویارک ټایمز  ورځپاڼې د راپور له مخې، په وینزویلا کې د امریکا پوځي مداخله د ټرمپ ملاتړي په دوو برخو ویشلي دي.

که څه هم په وینزویلا کې پوځي مداخله د ډیری جمهوري غوښتونکو له خوا د "بریا" په توګه ارزول شوې او لمانځل شوې، خو د "امریکا بیا ستر کړو" (MAGA) غورځنګ د ملاتړو او ځینو جمهوري غوښتونکو ترمنځ داسې کسان هم شته چې د پوځي مداخلې په وړاندې یې غبرګون ښودلی دی.

د ټرمپ پخواني سلاکار، سټیو بینن، په خپل "War Room" نومي پوډکاسټ کې، په وینزویلا کې د پوځي عملیاتو د ترسره کولو له څرنګوالي ستاینه وکړه. خو بینن دا هم وویل چې د پوځي مداخلې په اړه روښانه پیغام نه دی ورکړل شوی او دې وضعیت د دوی پلویان په غوسه کړي او حیران کړي یې دي. بینن وویل چې د ټرمپ د څرګندونو ترڅنګ، د بهرنیو چارو وزیر مارکو روبیو د حماس او حزب الله په نښه کولو څرګندونې "ګډوډي" رامنځته کړې.

د امریکا د ټولنیزو رسنیو مشهورې څېرې او مبصرې، کینډیس اوونز، د X په ټولنیزې رسنۍ کې په خپل حساب کې لیکلي چې د امریکا مرکزي استخباراتو ادارې (CIA) د "نړیوالو رواني ناروغانو" په امر "په یو بل هیواد یرغل کړی دی." اوونز دا پوځي مداخله په سوریه، افغانستان او عراق کې د امریکا له کړنو سره پرتله کړه.

د امریکا په کانګرس کې د جمهوري غوښتونکو ترمنځ هم ځینې داسې کسان شته چې پر پوځي مداخلې یې نیوکه کړې ده. د امریکا د استازو جرګې جمهوري غوښتونکې غړې، مارجري ټیلر ګرین، د ټرمپ اداره د امریکا خلکو ته په خدمت نه کولو تورنه کړه. ګرین ادعا وکړه چې اداره لویو شرکتونو، بانکونو او د نفتي شرکتونو مدیرانو ته خدمت کوي.

د استازو جرګې جمهوري غوښتونکي غړي، توماس مسی هم وویل چې په وینزویلا کې د ادارې مداخله "د نشه يي توکو سره د مبارزې موخه نه لري، بلکې د نفتو ګټې او د رژیم بدلون" په نښه کوي. مسی وویل: "موږ د دې لپاره رایه نه ده ورکړې."