نتنیاهو وویل چې د امریکا سره په ګډه هڅه کوي ترڅو فلسطینیانو ته په بل هیواد کې ځای پیدا کړي.

د اسرائیلو لومړي وزیر بنیامین نتنیاهو ویلي چې اسرائیل د امریکا سره په ګډه هڅه کوي هغه هېوادونه پیدا کړي چې فلسطینیانو ته د ښه راتلونکي فرصت برابر کړي. دا څرګندونې هغه د سپینې ماڼۍ په غونډه کې د امریکا ولسمشر ډونالډ ټرمپ سره د لیدنې پر مهال وکړې.

نتنیاهو د دوشنبې په ورځ د غونډې په پیل کې خبریالانو ته وویل: " اسرائیل د امریکا سره په ګډه کار کوي ترڅو هغه هېوادونه پیدا کړي چې فلسطینیانو ته ښه راتلونکی برابر کړي." هغه زیاته کړه چې له هغو فلسطینیانو سره سوله ممکنه ده چې د اسرائیلو د له منځه وړلو هڅه نه کوي، خو ټینګار یې وکړ چې "د امنیت واک به تل زموږ په لاس کې پاتې کېږي."

کله چې له ټرمپ څخه وپوښتل شول چې آیا د دوه دولتونو حل ممکن دی، هغه وویل: "زه نه پوهېږم" او پوښتنه یې نتنیاهو ته راجيح کړه، چا چې په مکرر ډول د فلسطیني دولت جوړېدو مخالفت څرګند کړی دی.

نتنیاهو وویل: "ځینې خلک له موږ څخه غواړي چې فلسطینیانو ته یو دولت ورکړو، خو دا به زموږ د له منځه وړلو لپاره یوه وسیله وي." هغه ادعا وکړه چې د اکتوبر تر اوومې وروسته، حماس په اسرائیلو کې په عملي توګه یو دولت رامنځته کولو هیلې له منځه "هغوی دا له منځه یووړ."

ټرمپ وویل چې هغه باور لري چې حماس کولی شي اوربند ته غاړه کیږدي. هغه زیاته کړه: "هغوی غواړي چې خبرې وکړي او اوربند وکړي."

نتنیاهو ټرمپ ته یو لیک هم وسپاره چې هغه د نوبل د سولې جایزې لپاره نوماند کړي. هغه ټرمپ ته وویل: " تاسو د دې وړ یاست." په ځواب کې ټرمپ وویل: "دا ستاسو له خوا ډېر ارزښتناک دی."

دواړو مشرانو د ایران په اړه هم خبرې وکړې. ټرمپ وویل چې هیله لري د اسرائیلو او ایران تر منځ جګړه پای ته ورسېږي او ټینګار یې وکړ چې په "مناسب وخت" کې د تهران پر وړاندې بندیزونه لرې کولو ته چمتو دی. هغه تایید کړه چې د ایران چارواکو سره خبرې په راتلونکې اوونۍ کې پلان شوې دي.

ټرمپ خبریالانو ته وویل: "موږ د ایران سره خبرې پلان کړې دي، او هغوی غواړي خبرې وکړي." د ټرمپ د منځني ختیځ استازي سټیو ویتکوف وویل چې غونډه به په "راتلونکې اوونۍ یا شاوخوا کې" ترسره شي.

کله چې له ټرمپ څخه د ایران پر وړاندې د بل برید په اړه وپوښتل شول، هغه وویل: "زه هیله لرم چې موږ دې ته اړتیا ونه لرو. زه تصور نه کوم چې دې ته اړتیا وي." هغه زیاته کړه: "زه هیله لرم چې دا پای ته ورسېږي. هو، زه فکر کوم ایران غواړي خبرې وکړي. زه فکر کوم هغوی غواړي سوله وکړي، او زه د دې ملاتړ کوم."