د پاکستان او افغانستان په نوو نښتو کې د لسګونو کسانو له وژل کېدو وروسته د اوربند اعلان وشو

د پولې د دواړو غاړو چارواکو ویلي، چې د چهارشنبې په ورځ د پاکستان او افغانستان ترمنځ په تازه سرحدي نښتو کې لسګونه سرتېري او ملکي وګړي ووژل شوي دي. همداشان  اسلام اباد اعلان وکړ دواړو خواوو پر ۴۸ ساعته اوربند هوکړه کړې ده.

دغه اوربند د پاکستان د بهرنیو چارو وزارت له خوا د دواړو ګاونډیو هېوادونو ترمنځ له یوې اوونۍ تاوتریخوالي وروسته اعلان شو. دغه تاوتریخوالی په کابل او د افغانستان په نورو برخو کې له هغو چاودنو وروسته زیات شو چې پړه یې پر پاکستان واچول شوه.

په کابل کې د طالبانو حکومت د غچ اخیستنې په موخه د خپل جنوبي پولې په اوږدو کې بریدونه پیل کړل، چې وروسته نښتې ډیرې شوې.

اسلام اباد پر افغانستان تور لګوي چې د پاکستاني طالبانو تحریک (TTP) په مشرۍ وسله والو ډلو ته یې پر خپله خاوره پناه ورکړې، خو کابل دا ادعا ردوي.

د اژانس فرانس پرس  خبریالانو ویلي، په داسې حال کې چې دواړه هېوادونه په کړکېچن حالت کې وو، د چهارشنبې په ماښام په کابل کې له دوو چاودنو وروسته د ښار له پاسه د تور لوګي لوخړې لیدل کېدې.

د طالبانو د حکومت ویاند ذبیح الله مجاهد وویل، چې د تېلو یو ټانکر او یو جنراتور چاودلي او اور لګېدلی، خو هغه په ښکاره دا چاودنې له پاکستان سره له نښتو سره ونه نښلولې.

خو یوې پاکستانۍ امنیتي سرچینې بیا ویلي، چې اسلام اباد د افغانستان په پلازمېنه کې "دقیق بریدونه" کړي دي.

خبري رسنیو  لیدلي چې امبولانسونه په کابل کې په چټکۍ روان وو او د زیانمنو شویو ودانیو ماتې شوې ښیښې پر سړکونو پرتې وې. طالب ځواکونو د ښار ځینې سړکونه هم تړلي وو.

اوربند شاوخوا یو ساعت وروسته د اسلام اباد له خوا اعلان شو. په کابل کې طالب چارواکو پوځ ته امر وکړ چې اوربند ته درناوی وکړي.

تر دې مخکې د پاکستان پوځ افغان طالبان تورن کړي وو چې په سوېل لوېدیځ او شمال لوېدیځ کې یې پر دوو لویو سرحدي پوستو بریدونه کړي دي.