نتنیاهو په غزه کې د نسل وژنې په ترڅ کې د امریکا د عامه افکارو د بدلولو لپاره د ټولنیزو رسنیو پر کارولو اعتراف وکړ

د اسرائیلو لومړی وزیر پر ټیک ټاک او اېکس (X) د نفوذ پیدا کولو هڅه کوي.

د اسرائیلو لومړي وزیر بنیامین نتنیاهو د جمعې په ورځ اعتراف وکړ چې حکومت یې په غزه کې د اسرائیلو د روانې نسل وژنې د غندنو په ترڅ کې، په امریکا کې د خپلو ښي اړخو د ملاتړ لپاره ټولنیزې رسنۍ د یوې "وسلې" په توګه ګوري.

په نیویارک کې د اسرائیلو په قونسلګرۍ کې له امریکايي اغېزناکو څېرو (influencers) سره په یوه غونډه کې، چې ویډیو یې د "ډیبرا ليا" په نوم یوې اغېزناکې څېرې پر خپل اېکس (X) اکاونټ خپره کړې، نتنیاهو ټولنیزې رسنۍ "په امریکا کې زموږ د ملاتړ د اډې د خوندي کولو لپاره تر ټولو مهمه وسله" وبلله.

هغه ټیک ټاک "تر ټولو مهمه پېرودنه چې همدا اوس روانه ده" وبلله، او ادعا یې وکړه چې د دې اپلیکېشن کنټرول "مهمې پایلې" لرلی شي.

نتنیاهو د اېکس (X) یادونه هم وکړه او ویې ویل: "موږ باید له ایلان (مسک) سره خبرې وکړو. هغه دښمن نه دی، هغه دوست دی."

هغه ادعا وکړه چې که پر ټیک ټاک او اېکس نفوذ خوندي شي، اسرائیل به "ډېر څه ترلاسه کړي."

د اسرائیلو ښکاره ملاتړ

د پنجشنبې په ورځ، د امریکا ولسمشر ډونالډ ټرمپ یو اجرایوي فرمان لاسلیک کړ چې له مخې یې هغه معامله تایید شوه چې د ټیک ټاک امریکایي چارې به یوه امریکايي کنسرسیوم (consortium) ته وسپارل شي، او دا چاره د یوه کورني قانون له مخې د ملي امنیت اړتیاوې پوره کوي.

ټرمپ وویل چې د پانګوالو په دې کنسرسیوم کې به د اوریکل (Oracle) ټیک شرکت، مایکل ډیل، روپرټ مرډوک او نور شامل وي.

د اوریکل بنسټ ایښودونکي لیري ایلیسن له کلونو راهیسې له اسرائیلو څخه ښکاره ملاتړ دا اندېښنې راپورته کړې چې پر ټیک ټاک د دې شرکت واک به د اسرائیلو د حکومت په ګټه وکارول شي.

د نتنیاهو دا څرګندونې په داسې حال کې راځي چې اسرائیل په غزه کې د خپلې نسل وژنې د جګړې له امله په زیاتیدونکې توګه یوازې شوی، چېرته چې د ۲۰۲۳ کال له اکتوبر راهیسې نږدې ۶۵،۶۰۰ فلسطینیان، چې اکثره یې ښځې او ماشومان دي، وژل شوي دي.

نتنیاهو د ملګرو ملتونو د عمومي اسامبلې په ۸۰مه غونډه کې یو تش تالار ته وینا وکړه، وروسته له هغه چې ډېری پلاوو په غزه کې د اسرائیلو د نسل وژنې په اعتراض کې غونډه پرېښوده، چې اوس یې نږدې دریم کال پوره کېږي.