په ۲۰۲۵ کال کې تورکیې ته د راغلو کډوالو شمېر د تیر کال په پرتله ۲۵.۲ سلنه زیات شوی او ۳۹۳،۸۲۹ کسانو ته رسیدلی دی.
د تورکیې د احصایې ادارې د ۲۰۲۵ کال لپاره "د نړیوال مهاجرت احصایې" خپرې کړې. د دې ارقامو له مخې، تورکیې ته په راغلیو کسانو کې ۵۶.۶ سلنه نارینه او ۴۳.۴ سلنه ښځې شاملې دي. له بهر څخه د راغلیو کسانو له جملې څخه ۹۱،۹۵۲ تنه د تورکیې اتباع او ۳۰۱،۸۷۷ تنه یې بهرني اتباع دي.
له بلې خوا، له تورکیې څخه بهر ته د تلونکو (مهاجرت کوونکو) کسانو شمېر د ۲۰۲۴ کال په پرتله ۵ سلنه کم شوی او ۴۰۳،۲۱۶ کسان ثبت شوي دي. په دې ډله کې ۵۵.۳ سلنه نارینه او ۴۴.۷ سلنه ښځې دي. له تورکیې څخه په تلونکو کسانو کې ۱۵۵،۱۱۹ تنه تورکیې اتباع او ۲۴۸،۰۹۷ تنه یې بهرني اتباع وو.
د عمرونو له مخې ویش:
کله چې په ۲۰۲۵ کال کې تورکیې ته راغلي کسان د عمر له مخې وڅېړل شي، تر ټولو زیات شمېر (۱۶.۳ سلنه) د ۲۰-۲۴ کلونو په ګروپ کې دي. له دې وروسته ۲۵-۲۹ کلن او بیا ۳۰-۳۴ کلن ځوانان راځي.
همداراز، له تورکیې څخه په وتلو کسانو کې هم تر ټولو لویه برخه (۱۴.۳ سلنه) د ۲۵-۲۹ کلونو ځوانان دي.
استانبول؛ تر ټولو زیات کډوال منونکی ولایت:
په ۲۰۲۵ کال کې تورکیې ته د راغلیو کسانو ۴۲.۲ سلنه استانبول ته تللي دي. له استانبول وروسته انتالیا (۹.۱٪)، انقره (۶.۷٪)، ازمیر (۳.۱٪) او بورسا (۲.۹٪) هغه ولایتونه دي چې تر ټولو زیات کډوال پکې میشت شوي دي.
همدارنګه، استانبول د ۳۵.۴ سلنې په درلودلو سره هغه ولایت دی چې تر ټولو زیات کسان ترې بهر ته کډوال شوي دي.
تر ټولو زیات کډوال له ترکمنستان څخه راغلي:
په ۲۰۲۵ کال کې تورکیې ته په راغلیو بهرنیو اتباعو کې لومړی مقام د ترکمنستان وګړو (۲۳.۴٪) درلود. له هغه وروسته اذربایجان (۸.۳٪)، ازبکستان (۶.۹٪)، مصر (۶.۱٪) او افغانستان (۵.۸٪) هغه هیوادونه دي چې وګړي یې تورکیې ته راغلي دي.
په مقابل کې، له تورکیې څخه په وتلو بهرنیو اتباعو کې لومړی ځای د عراق وګړو (۱۵.۷٪) درلود او له هغه وروسته افغانستان (۱۱.۲٪)، روسیه (۷.۶٪)، ایران (۶.۳٪) او ترکمنستان (۵.۷٪) ځای لري.
