د امریکا او پاکستان ترمنځ لوړ پوړې خبرې په واشنګټن ډي سي کې د سولې بورډ د پرانیستغونډې په څنډه کې وشوې.

د امریکا د بهرنیو چارو وزیر مارکو روبیو په واشنګټن ډي سي کې د پاکستان له لومړي وزیر شهباز شریف سره د خبرو پر مهال د پاکستان د حیاتي منرالونو او انرژۍ سکتورونو د پراختیا په اړه خبرې کړې دي.

دا لیدنه د پنجشنبې په ورځ د سولې بورډ (Board of Peace) د پرانیستغونډې په څنډه کې وشوه، چې پاکستان پکې د یوه بنسټ ایښودونکي غړي په توګه ګډون کړی و.

د امریکا د  بهرنیو چارو وزارت د لومړي مرستیال ویاند ټامي پیګوټ د یوې اعلامیې له مخې، روبیو د غزې لپاره د ولسمشر ډونالډ ټرمپ له ۲۰ ماده يیز پلان څخه د دوامداره ملاتړ او د بورډ په لومړۍ غونډه کې د ګډون له امله له پاکستان څخه مننه وکړه.

په هېواد کې بریدونه

هغه همدارنګه د امریکا په پلازمېنه کې د حیاتي منرالونو په اړه په وروستۍ وزیرانو کچه غونډه کې د پاکستان د ګډون هرکلی وکړ.

پیګوټ وویل، «چارواکو د حیاتي منرالونو او انرژۍ سکتور پر پراختیا او همدارنګه د امریکايي شرکتونو لپاره د سوداګریزو پانګونو پر فرصتونو خبرې وکړې.»

دغه خبرې د پاکستان د طبیعي زیرمو په پراختیا کې پر همکارۍ او د امریکا د خصوصي سکتور د ښکېلتیا لپاره د فرصتونو پر پراخولو متمرکزې وې.

په جلا توګه، روبیو د بلوچستان په سوېل لوېدیځ ولایت کې د جنورۍ په ۳۱مه نېټه د غیر قانوني ډلې 'بلوچستان لیبریشن آرمي' لخوا د «ناوړه» بریدونو او همدارنګه په اسلام اباد کې په یوه جومات کې د فبرورۍ د ۶مې نېټې د ځانمرګي برید له امله خپله خواخوږي څرګنده کړه.

هغه د ترهګرۍ ضد هڅو کې د امریکا او پاکستان د همکارۍ پر اهمیت یو ځل بیا ټینګار وکړ او د امنیتي ننګونو په هوارولو کې یې د دواړو هېوادونو پر ملګرتیا هم ټینګار وکړ.