د کاناډا د تورنتو ښار په کتابتون کې په یوې حجاب لرونکې مسلمانې میرمنې پرته د کوم سببه برید وشو.
د کاناډا د تورنتو په یو عامه کتابتون کې په یوې مسلمانې میرمنې برید وشو
یو مشکوک کس د کاناډا د ټورنټو ښار ته نږدې په یوه عامه کتابتون کې په یوې مسلماني ښځې د برید کولو په تور ونیول شو. د پولیسو د وینا له مخې، بریدګر هڅه کړې وه چې د مسلمانې میرمنې حجاب ته اور واچوي.
د ډرهم سیمه ییزو پولیسو په یوه بیان کې وویل: "یوې مسلمانې ښځې په کتابتون کې پر مطالعې بوخته وه چې یوه نااشنا ښځه ورته ورنږدې شوه. بریدګرې ښځې پر سر د یو ډول مایع موادو د شیندولو نه وروسته د هغې د سوځولو هڅه وکړه. ."
پولیسو وویل: "بریدګرې هڅه وکړه چې د مسلمانې میرمنې حجاب لرې کړي او پرې یې یو نااشنا مایع توی کړ. وروسته هغې د اورلګیت په مرسته هڅه وکړه چې حجاب ته اور واچوي."
قرباني د مرستې لپاره چیغې کړې، او د کتابتون امنیتي کارکوونکو مداخله وکړه. د پولیسو په وینا، بریدګره له سیمې وتښتېده، خو څو ساعته وروسته ونیول شوه.
د کاناډایي مسلمانانو ملي شورا په یوه مطبوعاتي اعلامیه کې وویل چې دوی د دې پېښې په اړه "په ژوره توګه خواشیني" دي.
د کاناډایي مسلمانانو ملي شورا اجرائیه رئیس سټیفن براون وویل: "دا د حیرانتیا خبره ده چې زموږ په ټولنه کې دا ډول تاوتریخوالی عادي شوی دی. په وروستیو کلونو کې د اسلاموفوبیا پېښې په بې ساري ډول زیاتې شوې دي."
هغه زیاته کړه: "دا وخت دی چې زموږ ټاکل شوي مشران په ګډه د دې ستونزې د حل لپاره ګامونه پورته کړي."
د اجاکس ښاروال شاون کولیر او د کتابتون بورډ مشره پییالي کوریا په ښاروالۍ ویب پاڼه کې په یوه ګډه اعلامیه کې وویل:
"د دې ناوړه عمل قرباني او ټولو هغو کسانو ته چې د دې برید له امله زیانمن شوي، خپه شوي یا ناهیلي شوي دي — په ځانګړې توګه دا پېښه د روژې په مبارکه میاشت کې رامنځته کیدل، چې د سولې او روحاني اړیکو میاشت ده مونږ ټول ډیر خواشیني کړي یو— موږ ستاسو ملاتړ کوو او د هر ډول کرکې او زغم نشتوالي پر وړاندې درېږو."
براون وویل چې د کاناډایي مسلمانانو ملي شورا له پولیسو غوښتي چې دا پېښه د کرکې جرم په توګه وڅېړي.