ولسمشر اردوغان په خپور کړي پيغام کې ددې خبرې په ټینګار ویلي دي چې موږ د تورکیې جمهوریت د تلپاتې کولو لپاره  د خپل ټول وس او توان سره کار کوو.

ولسمشر اردوغان د اکتوبر د ۲۹مې، د جمهوریت د ورځې په مناسبت په خپل پیغام کې وویل، "په دې لوړ شعور سره، موږ د خپلو شهیدانو او غازیانو امانت ته د درناوي او د تورکیې جمهوریت چې په زړورو او وفادارو په لاسونو جوړ شوی، د پایښت او تل پاتي کیدو لپاره د خپل ټول وس او توان سره هڅه کوو."

د ولسمشر اردوغان د پیغام بشپړ متن په لاندې ډول دی:

"زما ګران ملته،
د نړۍ په بېلابېلو هېوادونو کې زموږ په ویاړ کې شریک درنو میلمنو،

تاسو ټولو ته د زړه له کومې سلامونه، حرمت او محبت وړاندې کوم.

زموږ د بریاوو څخه ډک تاریخ په دې مهمه ورځ؛
زه په هېواد کې دننه د خپلو ۸۶ میلیونه هېوادوالو، د قبرس د ترکانو او په بهر کې د خپلو خویندو او ورونو هر یوه ته د اکتوبر د ۲۹مې، د جمهوریت د جشن مبارکي وایم.

همدارنګه، د خپل ځان او خپل ملت په استازیتوب له ټولو هغو دوستانو مننه کوم چې زموږ د تمدن په باغ کې یې له موږ سره یو ځای کار کړی، چې موږ ورسره ګډ ماضي او کلتوري میراث لرو او زموږ په خوښیو کې شریک دي.

نن موږ د خپل جمهوریت  د تاسیس ۱۰۲مه کلیزه په ډېر ویاړ سره لمانځو.

هیله من یم چې دا مهمه ورځ، چې زموږ د خپلواکۍ او راتلونکي ارمان د ملت په بې قید او شرطه حاکمیت کې نغښتی دی، زموږ هېواد، ملت او ټول بشریت ته د خیر او برکت وسیله وګرځي.

یو ځل بیا د تورکیې جمهوریت د  بنسټګر غازي مصطفی کمال اتاترک او د غازي پارلمان ټولو غړو ته چې د ملي مبارزې په مشرۍ یې د جمهوریت لار پرانیسته، د زړه له کومې مننه کوم.

له اخلاط او ملازګرد له لومړنیو بریدونو څخه تر د چناق قلعې تر حماسې، د خپلواکۍ له جګړې څخه د جولای د ۱۵مې د ستر مقاومت پورې، د هغو اتلانو یاد په رحمت سره کوم چې د پېړیو پېړیو راهیسې د  خپلو وینو او قربانیو سره  دا خاوره  موږ ته وطن ګرځولې ده.

غواړم نن یو ځل بیا هغه حقیقت اعلان کړم چې ټوله نړۍ پرې پوهیږي:
موږ هم یو پیاوړی ملت یو او هم یو لرغونی دولت.

زموږ د جمهوري ریاست په نښان کې لمر او د هغه شاوخوا ۱۶ ستوري زموږ د زرګونو کلونو دولتي دود استازیتوب کوي.

دا هر یو دولت چې موږ د "تلپاتې دولت" په ارمان جوړ کړی، زموږ د ملي هویت د شان او شوکت نښه ده.
دا زموږ د ګران ملت د قدرت او رحمت نښه ده چې نړۍ ته یې لارښوونه کړې ده.

د تورکیې جمهوریت زموږ د فداکار ملت وروستۍ پناه ځای دی، زموږ د دولتونو د ځنځیر وروستۍ کړۍ ده، چې د خپل تاریخ په تر ټولو سختو ورځو کې یې، د ټولو  ستونزو، ناخوالو ، نشتوالي او کړاوونو سره سره، خپله ازادي او خپلواکي ټینګه ونیوله.

په دې لوړ شعور سره، موږ د خپلو شهیدانو او غازیانو امانت ته د درناوي او
د تورکیې جمهوریت چې د زړورو او وفادارو په لاسونو جوړ شوی، د تل لپاره د پایښت په موخه په خپل ټول توان هڅه کوو.

د "تورکیې پیړۍ" د موخو په لور، چې موږ به پرې خپله نښه پرېږدو؛
له دفاعي صنعت څخه تر اقتصاد، له پوهنې څخه تر کرنې، ګرځندوی، انرژۍ او بهرنۍ پالیسۍ پورې په هره برخه کې د پام وړ پرمختګونه کوو.

موږ د ۲۰۲۳ کال د فبرورۍ د ۶مې زلزلې ټپونه رغوو او خپل زیانمن شوي وروڼه په چټکۍ سره خپلو خوندي کورونو ته رسوو.
انشاالله د کال تر پایه به، لکه څنګه چې مو ژمنه کړې وه، د ۴۵۳ زره کورونو کیلیانې وسپارو.

په ورته وخت کې، موږ د یوې له ترهګرۍ پاکې تورکیې په لور په ډاډمنو ګامونو روان یو، چیرې چې زموږ ۸۶ میلیونه وګړي به په سوله، امنیت، ارامۍ او سوکالۍ کې ژوند وکړي.

پرته له دې چې د ګډوډۍ رامنځته کوونکو ته چې زموږ ملي یووالی او پیوستون په نښه کوي، فرصت ورکړو؛
انشاالله موږ به د خنډونو په لرې کولو، د دسیسو په شنډولو او د پراختیا غوښتونکو د هیلو په خاورو کېدو ته دوام ورکړو.

له بلې خوا، په داسې یو وخت کې چې جګړې، شخړې او بحرانونه نړیوال ارزښتونه له منځه وړي، موږ د تورکیې په توګه،
د حق او حقیقت د دفاع کوونکي په توګه د "یوې عادلانه نړۍ" لپاره په خپل ټول توان هڅه کوو.

په غزه او فلسطین کې په ځانګړې توګه، په ډېرو بحراني سیمو کې؛
موږ د خپلو منځګړیتوب هڅو، ډیپلوماتیکو نوښتونو او بشري مرستو سره د وینې تویدنې د درولو،
د ټپونو د رغولو او د تلپاتې سولې لپاره د لارې د پرانیستلو هڅه کوو.

زموږ د ۳۶۰ درجې بهرنۍ پالیسۍ لید سره، چې له دوه سره سلجوقي عقاب څخه الهام اخلي،
موږ به د خپل تاریخ او هویت سره سم، خپلې ټولې دندې په ډېر دقت سره ترسره کولو ته دوام ورکړو.

موږ به په ګډه یوه لویه، پیاوړې او سوکاله ترکیه جوړه کړو، چې په خپله سیمه کې به مخکښه او په نړۍ کې به د درناوي وړ وي.

خدای دې زموږ مل او مرستندوی وي، زه یو ځل بیا خپل ګران شهیدان په رحمت او غازیان په مننې سره یادوم.

زه خپلو ټولو هېوادوالو او ټولو هغو دوستانو او مېلمنو ته چې زموږ په خوښیو کې شریک دي، د جمهوریت د ورځې مبارکي وایم.

زموږ د جمهوریت ۱۰۲مه کلیزه دې مبارک وي!
په خیر پاتې شئ."