د تورکيې ولسمشر رجب طیب اردوغان وايي، د اسرائیل د پارونو له امله د رامنځته شوې جګړې منفي اغېزې په انرژۍ، سوداګرۍ، ټرانسپورټ، اقتصاد، کرنې او امنیتي سکتورونو کې احساسېږي.
د تورکيې ولسمشر رجب طیب اردوغان د سه شنبې په ورځ وویل، په داسې حال کې چې اسلامي نړۍ د سولې د فضا په لټه کې ده، اسرائیل په غزه، اشغال شوې لوېدیځه غاړه، ختیځ بیت المقدس او لبنان کې خپلو "اشغال، ویجاړیو، عام وژنو او غیرقانوني مېشت ځایونو جوړولو" ته دوام ورکوي او د شته اوربندونو سپکاوی کوي.
ولسمشر اردوغان د لوی اختر په مناسبت په خپور کړي پیغام کې، د الله تبارک و تعالی شکر ادا کړ چې تورکيې ته یې یو ځل بیا په روغتیا او ارامۍ کې اختر ته د رسېدو توفیق ورکړ، خو پر دې یې هم خپګان وښود چې د "اسرائیل د لمسونو له امله" د ایران د جګړې منفي اغېزې په انرژۍ، کرنه، سوداګرۍ، ټرانسپورټ، اقتصاد او امنیت په ګډون په بېلابېلو نړیوالو سکتورونو کې احساسېږي.
په دغه پیغام کې چې د ولسمشرۍ په ویب پاڼه او په ایکس (پخواني ټویټر) کې د ویډیو په بڼه خپور شوی، وویل: "په داسې دوره کې چې زموږ سیمه له کړکېچونو سره لاس او ګرېوان ده، تورکیه د خپل اقتصاد، تکړه پرسونل او پیاوړې کورنۍ جبهې سره د ثبات د یوې ټاپو په څېر ولاړه ده."
هغه دا هم وویل چې تورکیه اوس د هغو پالیسیو ګټې ترلاسه کوي چې په تېرو ۲۳ کلونو کې د عدالت او پراختیا ګوند لخوا "له نیوکو او خنډونو سره سره" پلې شوې دي، په ځانګړې توګه په دفاعي صنعت کې.
هغه زیاته کړه: "د دفاعي او هوايي فضا صادرات له ۲۴۸ میلیون ډالرو څخه تر ۱۰ میلیارد ډالرو پورې لوړ شوي، چې تورکیه په نړۍ کې د بریا یوه نادره کیسه لیکي."
اردوغان وویل کله چې په سیمه کې بې ثباتي کمه شي، تورکیه به د "نوي عصر د ځلېدونکو ستورو څخه یو" په توګه راڅرګنده شي. هغه د سیمې د سولې لپاره د تورکيې دوامداره هڅو او د منځګړیتوب وړاندیزونو ته په اشارې سره وویل: "موږ د دې لپاره هر هغه څه کوو چې لازم وي."
ولسمشر اردوغان د نړۍ ټولو مسلمانانو ته په ځانګړې توګه د تورکیې میړانه ملت ته د لوی اختر د رارسیدو له امله مبارکي وویله.
