اسرائیلو په عراق کې د ایران پر ضد د عملیاتو د ملاتړ لپاره دوه پټې پوځي اډې جوړې کړې دي
د نیویارک ټایمز د یوه راپور له مخې، اسرائیلو د ایران پر وړاندې د خپلو عملیاتو د ملاتړ په موخه د عراق په لوېدیځه دښته کې دوه پټې پوځي اډې جوړې کړې دي. یادې ورځپاڼې د عراقي او سیمه ییزو چارواکو په حواله ویلي چې دا پټې اسانتیاوې له یو کال څخه د ډېرې مودې راهیسې د اسراییلو له خوا کارول کېږي.
چارواکو ویلي چې له دې ځایونو څخه د هوايي ملاتړ، تېل اچولو او طبي خدماتو لپاره کار اخیستل کېده او وروسته یې د ۲۰۲۵ کال په جون کې د ایران پر وړاندې د ۱۲ ورځنۍ جګړې پر مهال هم مهم رول درلود.
د دغو اډو له جملې څخه یوه یې هغه مهال افشا شوه چې یوه عراقي شپون «عوض الشمري» د مارچ په میاشت کې د «النخیب» سیمې ته نږدې غیرعادي پوځي فعالیتونه ولیدل. هغه سیمه ییزو چارواکو ته خبر ورکړ چې هلته یې چورلکې، خیمې او د الوتکو د ناستې یو لنډمهاله میدان لیدلی دی.
په راپور کې ویل شوي چې الشمري وروسته مړ وموندل شو او هغه عراقي ځواکونه چې د سیمې د پلټنې لپاره لېږل شوي وو هم تر برید لاندې راغلل، چې په پایله کې یې یو سرتېری ووژل شو او دوه نور ټپیان شول. د دې میاشتې په پیل کې، وال سټریټ ژورنال هم راپور ورکړی و چې اسرائیلو په سیمه کې یوه پټه پوځي اډه جوړه کړې ده.
بلخوا، د اناتولیا خبري اژانس سره په خبرو کې، یوه لوړپوړي عراقي امنیتي چارواکي په لوېدیځه دښته کې د اسرائیلو د پوځي فعالیتونو ادعاوې «دروغ» وبللې او رد یې کړې. خو یاد چارواکي ومنله چې عراقي ځواکونو د مارچ په میاشت کې د النخیب دښتې په سیمه کې له یو لړ «مبهمو» هوايي عملیاتو سره مقابله کړې وه او په وینا یې هغه مهال دغې پېښې ته رسېدنه شوې وه.
