په اتریش کې په یو ښوونځي د برید له امله ۹ تنو ژوند د لاسه ورکړی او ګنشمیر نور ټپیان شوي.
په اتریش کې د ګراتز په ښار کې په یو ښوونځي کې په برید کې لږ تر لږه نهه کسان وژل شوي او څو نور ټپیان شوي دي.
د اتریش دولتي رسنۍ ORF د سه شنبې په ورځ وویل چې په دې پېښه کې څو کسان، چې زده کوونکي او ښوونکي پکې شامل دي، په جدي توګه ټپیان شوي دي. ویل شوي چې مشکوک بریدګر، چې ګومان کېږي یو زده کوونکی و، ځان وژلی دی.
پولیسو ویلي چې په یوه کوڅه کې چې یو ثانوي ښوونځیهم موجود دی، عملیات روان دي، خو د نورو جزئیاتو له ورکولو ډډه یې کړې ده.
د ګراتز ښار پولیسو د سه شنبې په ورځ د یوې تیلیفوني راپور د ترلاسه کولو نه وروسته ښوونځي ته ګڼشمیر ځواکونه واستول ویلي یې دي چې د ډزو غږونه اورېدل شوي دي.
د پولیسو ویاند صبري یورګون وویل چې ځانګړي ځواکونه د سهار په لسو بجو د ښوونځي لپاره استول شوي وو، او چارواکي هڅه کوي چې د پېښې په اړه بشپړ معلومات ترلاسه کړي.
ګراتز، چې د اتریش دویم لوی ښار دی، د هېواد په جنوب ختیځ کې موقعیت لري او شاوخوا ۳۰۰,۰۰۰ تنه نفوس لري.
د برید انګیزه او علت معلوم ندی. برید کوونکي د برید نه وروسته خپل ځان هم وژلی دی.
