د پاکستان امنیتي ځواکونو له همغږو بریدونو وروسته پراخ عملیات پیل کړي، په داسې حال کې چې په ټول هېواد کې د تاوتریخوالي زیاتوالي د ثبات په اړه اندېښنې راپاریدلي دي.

پاکستاني امنیتي ځواکونو وویل چې د دوشنبې په ورځ یې په سویل لویدیځ بلوچستان کې ۲۲ نور وسله وال وژلي دي. له دې سره د څلور ورځنیو پوځي عملیاتو په ترڅ کې د وژل شویو وسله والو شمېر ۱۷۷ ته ورسېد.

یوه امنیتي چارواکي د نوم نه ښودلو په شرط اناتولیا (Anadolu) خبري اژانس ته وویل چې تازه مرګ ژوبله د هغو چاڼیزو عملیاتو پر مهال اوښتې چې د شنبې په ورځ په بلوچستان کې په ۱۲ ځایونو کې له همغږو بریدونو وروسته پیل شول.

د چارواکو په وینا، د دغو بریدونو مسوولیت ناقانونه ګرځول شوې ډلې، د بلوچستان ازادي غوښتونکي پوځ (BLA)، منلی دی. په دغو بریدونو کې ۳۱ ملکي وګړي او ۱۷ امنیتي سرتېري وژل شوي وو.

پوځي عملیات له جمعې ورځې راهیسې پیل شوي او ورسره سخت امنیتي تدابیر نیول شوي دي. په کوټه او نورو سیمو کې انټرنیټي او د موبایل خدمتونه بند دي او له تېرو دریو ورځو راهیسې د اورګاډي تګ راتګ هم په ټپه ولاړ دی. د بلوچستان د حکومت یوه لوړپوړي چارواکي، حمزه شفقت، ویلي چې تمه ده انټرنیټي خدمتونه د سه شنبې په ورځ بېرته فعال شي.

په ترهګریزو بریدونو کې زیاتوالی:

دا نښتې په داسې حال کې زیاتېږي چې په ټول پاکستان کې د وسله والو بریدونو کچه لوړه شوې ده. د دوشنبې په ورځ د خپرو شویو معلوماتو له مخې، په جنوري میاشت کې د ډسمبر په پرتله په جګړو کې د مړو شمېر ۴۳ سلنه زیات شوی دی.

د "پاکستان د شخړو او امنیتي مطالعاتو انسټیټیوټ" د ارقامو له مخې، تېره میاشت په ټول هېواد کې ۳۶۱ کسان وژل شوي چې په هغو کې ۲۴۲ وسله وال، ۷۳ ملکي وګړي او ۴۶ امنیتي سرتېري شامل دي. همدارنګه په جنوري میاشت کې په ټول هېواد کې ۸۷ ترهګریز بریدونه شوي چې د ډسمبر په پرتله ۲۸ سلنه زیاتوالی ښيي. له دې جملې څخه ۲۷ بریدونه یوازې په بلوچستان کې شوي دي.