ملګروملتونو ویلي دي چې د اسرائیلو لخوا په غزه کې کې قتل عام روان دی او په غزه کې د پختورګي د دیالیسس ناروغانو ۴۰ سلنه د روغتیاي امکاناتو د نه شتون له امله ژوند د لاسه ورکړی دی.

ملګرو ملتونو ویلي دي چې د ۲۰۲۳ کال د اکتوبر راهیسې په محاصره شوي غزه کې د ډیالیسس ناروغانو څخه څه باندې ۴۰ سلنه مړه شوي دي. دا د اسرائیلي بریدونو له امله چې روغتیایي مرکزونه یې په نښه کړي یا د ناروغانو لپاره د لاسرسي نشتون له امله رامنځته شوي دي، چې د بشري ناورین ژورتیا یې نوره هم زیاته کړې ده.

د ملګروملتونو د  بشري چارو د همغږۍ دفتر  په حواله، د ملګرو ملتونو ویاند سټیفان دوجاریک د دوشنبې په ورځ یوې خبري غونډې ته وویل چې "په لسګونو کسان وژل شوي او ټپیان شوي دي، داسې ښکاري چې دوی د رفح او دیر البلح په پوځي مرکزونو کې د مرستو ترلاسه کولو پر مهال په نښه شوي دي."

دوجاریک زیاته کړه چې د اسرائیلي بریدونو دوام د روغتیایي زیربناوو په وړاندې ستونزې زیاتې کړې دي، او د شمالي غزې د ډیالیسس مرکز (نورا الکعبي مرکز) د یکشنبې په ورځ په نښه شوی دی.

هغه وویل: "د غزې د روغتیا وزارت راپور ورکړی چې د ۲۰۲۳ کال د اکتوبر د جګړو د زیاتوالي راهیسې د ډیالیسس ناروغانو څخه  څه باندې ۴۰ سلنه مړه شوي دي. دا ځکه چې مرکزونه یا خو په نښه شوي یا د ناروغانو لپاره د لاسرسي وړ نه وو."

د فلسطیني مځکو د غضب  د زیاتیدو په اړه خبرداری ورکولو سره، دوجاریک وویل: "د شنبې په ورځ، اسرائیلي چارواکو په خان یونس او دیر البلح کې د نورو خلکو د ځای پر ځای کیدو امر وکړ. ددې  امر له امله  شاوخوا ۱۰۰,۰۰۰ کسانو اغیزمن شوی .

هغه زیاته کړه: "په ټوله کې، د مارچ له ۱۸مې راهیسې، د بشري مرستو شریکان اټکل کوي چې د غزې د ټول نفوس نږدې دریمه برخه، چې له ۶۴۰,۰۰۰ څخه زیات خلک کیږي، بیا بې ځایه شوي دي."

په داسې حال کې چې له غزې څخه د کرم ابو سالم د لارې څخه د ۳۰۰ څخه زیات د مرستو لاریو ته اجازه ورکړ شوې ، خو د لاسرسي ستونزې لا هم شته.

دوجاریک وویل: "نن ورځ، زموږ یوه هڅه چې د کرم شالوم څخه مرستې ترلاسه کړو، رد شوه."

اسرائیل د ۲۰۲۳ کال د اکتوبر راهیسې په غزه کې د نسل وژنې عملیات ترسره کوي. فلسطینیانو د ۵۴,۴۷۰ څخه د زیاتو کسانو وژنې ثبت کړې دي، چې زیاتره یې ښځې او ماشومان دي.

د فلسطین رسمي خبري اژانس (WAFA) په وینا، شاوخوا ۱۱,۰۰۰ فلسطینیان د ویجاړ شویو کورونو لاندې ښخ شوي دي.

کارپوهان بیا باور لري چې د مړو شمیر د غزې چارواکو د راپورونو څخه خورا زیات دی، او اټکل کوي چې دا شمیره شاوخوا ۲۰۰,۰۰۰ ته رسیدلی شي.

د دې نسل وژنې په جریان کې، اسرائیل د غزې زیاتره برخه په کنډوالو بدله کړې او د دې ټول نفوس یې نږدې بې ځایه کړی دی.

د مرستو ادارو خبرداری ورکړی چې د غزې د ۲ میلیونو څخه د زیاتو خلکو لپاره د قحطۍ خطر شته.

تیر نوامبر، د نړیوالې جنایي محکمې لخوا د اسرائیلو لومړي وزیر بنیامین نتنیاهو او د هغه د پخواني دفاع وزیر یوآف ګالانټ لپاره د جنګي جرمونو او د بشریت پر وړاندې د جرمونو په تور د نیولو امرونه صادر شول.

اسرائیل د غزې په سیمه کې د ملکي وګړو پر وړاندې د جنګي جرمونو لپاره د نړیوالې محکمې لخوا د نسل وژنې قضیې سره هم مخ دی.