د ایران د حکومت په وینا، کمیسیون به د اړوندو ادارو څخه اسناد او شواهد راټول کړي ترڅو د ناکراریو لاملونه وڅیړي.

د ایران حکومت د جمعې په ورځ اعلان وکړ چې د څېړنې یو کمېسیون یې جوړ کړی ترڅو د ژوند د لوړو لګښتونو پر ضد لاریونونه وڅېړي، هغه لاریونونه چې د حکومت ضد لاریونونو ته یې لاره هواره کړه او زرګونه کسان پکې ووژل شول.

د ایران د حکومت ویاندې فاطمه مهاجراني سیمه ییز خبري اژانس ایسنا ته وویل: "د اړوندو ادارو د استازو په ګډون د حقیقت موندنې یوه کمیټه جوړه شوې، اسناد راټولوي او بیانونه اوري."

ویاندې روښانه نه کړه چې ایا کمېسیون به یوازې پر هغو اقتصادي غوښتنو تمرکز وکړي چې لاریونونه یې راوپارول، که به د لاریونونو پر مهال د وژل شویو کسانو څېړنه هم وکړي.

هغې وویل: "وروستی راپور به د پروسې له بشپړیدو وروسته د عامه معلوماتو او نورو قانوني اقداماتو لپاره خپور شي."

د پنجشنبې په ورځ، حکومتي ویب پاڼې د ولسمشر مسعود پزشکيان تبصرې خپرې کړې چې ویلي یې دي "موږ ټیمونه ګمارلي دي چې د (ناکراریو) لاملونه وڅیړي، پرته له دې چې نور جزئیات وړاندې کړي.

دغه لاریونونه، چې د دسمبر په وروستیو کې پیل شول او د جنوري په اتمه نیټه یې شدت وموند، د رسمي شمېر له مخې له ۳۰۰۰ څخه زیات کسان پکې ووژل شول.

ایراني چارواکي ادعا کوي چې د قربانیانو لویه برخه امنیتي ځواکونه یا عادي خلک وو چې د «ترهګرو» لخوا وژل شوي، هغه ترهګر چې د اسراییل او متحده ایالاتو لپاره کار کوي.

په هرصورت، د ایران څخه بهر میشته د بشري حقونو مدافع ډلې امنیتي ځواکونه د لاریون کونکو په نښه کولو تورنوي.

په متحده ایالاتو کې مېشت د بشري حقونو فعالانو خبري اژانس (HRANA) راپور ورکړی چې د لاریونونو د اوج په جریان کې لږ تر لږه ۷۰۰۵ کسان وژل شوي دي.

د حکومت په وېب پاڼه کې د خپور شوي راپور له مخې، پزشکيان وویل: «موږ شرمېږو چې داسې بدمرغه پېښې رامنځته شوې دي.»