هغه وویل: «زه فکر کوم چې جګړه نږدې ده چې پای ته ورسېږي، هو. زما په اند دا ډېره نږدې ده چې پای ته ورسېږي»، ټرمپ دا خبرې د فاکس بیزنس له کوربنې ماریا بارتیرو مو سره د مرکې پر مهال وکړې، کله چې ترې وپوښتل شول چې ایا جګړه «پای ته رسېدلې ده که نه»، دا مرکه د چهارشنبې په ورځ خپرېږي.
د مرکې یوه ویډیويي برخه په اېکس کې شریکه شوې ده.
ټرمپ زیاته کړه: «پوهېږئ څه؟ که زه همدا اوس شا ته شم، نو دوی ته به شل کاله وخت ونیسي چې خپل هېواد بیا ورغوي، او موږ لا پای ته نه یو رسېدلي. موږ به وګورو چې څه پیښیږي. زما په اند هغوی ډېر غواړي چې یو تړون وکړي.»
مخکې له دې، بارتیرو مو په انسټاګرام کې په یوه ویډیو کې ویلي وو چې ټرمپ د مرکې پر مهال د ایران جګړې ته څو ځله د تېر وخت په بڼه اشاره وکړه، چې هغه یې دې ته وهڅوله چې نېغه پوښتنه وکړي: «ایا جګړه پای ته رسېدلې ده؟»
بارتیرومو وویل: « ټرمپ: ‘جګړه پای ته رسېدلې ګڼي’»، او د خبرو دغه تبادله یې تشریح کړه.
د تېرې اوونۍ په پای کې د پاکستان په پلازمېنه اسلاماباد کې خبرې وشوې ترڅو د ایران پر ضد د امریکا-اسرائیل جګړه، چې د فبرورۍ په ۲۸ پیل شوې وه، په دایمي ډول پای ته ورسول شي، خو کومه هوکړه ترلاسه نه شوه.
د خبرو د بل پړاو د ترسره کولو هڅې روانې دي.
ټرمپ د امریکا او ایران ترمنځ د مستقیمو خبرو د بیا پیل په اړه هیله مند دریځ وښود، او د سې شنبې په ورځ یې وویل چې ښايي دا خبرې په راتلونکو دوو ورځو کې په پاکستان کې بیا پیل شي.
پاکستان د اپریل په ۸مه د دوه اونیو اوربند منځګړیتوب وکړ، چې لاهم دوام لري.
