ولسمشر اردوغان د امریکا او ایران د اوربند هرکلی وکړ، پر بشپړ پلي کېدو یې ټینګار وکړ

د تورکیې ولسمشر رجب طیب اردوغان په سیمه کې د ارامۍ غوښتنه وکړه او د اوربند وروسته یې د هر ډول "پارونکو اقداماتو" یا "سبوتاژ" په اړه خبرداری ورکړ.

د تورکیې ولسمشر رجب طیب اردوغان د چهارشنبې په ورځ د ایران پر وړاندې د اسرائیل او امریکا په جګړه کې د اعلان شوي اوربند هرکلی وکړ او په عملي ډګر کې یې د هغه پر بشپړ پلي کېدو ټینګار وکړ. هغه په دې برخه کې د هر ډول تخریبي هڅو په اړه خبرداری ورکړ.

اردوغان پر خپله ایکس (X) پاڼه ولیکل: "موږ د هغه اوربند هرکلی کوو چې تېره شپه په هغې جګړه کې اعلان شو چې زموږ سیمه یې د فبرورۍ له ۲۸مې راهیسې ځپلې ده."

ولسمشر اردوغان ټولو هغو لوریو ته مبارکي ورکړه چې په دې اوربند کې یې رول درلود او په ځانګړي ډول یې د پاکستان هڅې وستایلې چې په دې پروسه کې یې کلیدي ونډه لرلې ده. هغه زیاته کړه: "موږ په صادقانه ډول هیله لرو چې زموږ سیمه، چې له ډېرې مودې راهیسې د جګړې، کړکېچ او ظلمونو نښې پرې پاتې دي، ډېر ژر سوله، ثبات او ارامي ومومي."

اردوغان ټینګار وکړ چې ترکیه به په کور دننه او بهر د سولې لپاره خپلې مبارزې ته دوام ورکړي او په نړیوالو فورمونو کې به خپل غږ پورته کوي.

امریکا او ایران د سه شنبې په ورځ پر دوه اوونیز اوربند موافقه وکړه. دا موافقه یوازې څو ساعته مخکې له هغه مهلت څخه وشوه چې ولسمشر ډونالډ ټرمپ ټاکلی و؛ هغه ګواښ کړی و چې که هوکړه ونشي، د ایران پر بنسټیزو تاسیساتو به لوی بریدونه وکړي.

د دې هوکړې پر بنسټ، امریکا او اسرائیل به پر ایران بریدونه بندوي او په بدل کې به یې تهران د هرمز تنګی د سوداګریزو کښتیو پر مخ پرانیزي، چې دا د نړۍ د تېلو د لېږد یوه مهمه لاره ده.

دا اوربند د ایران د هغې ۱۰ ماده ییزې طرحې په اړه خبرو ته لاره هواروي چې ټرمپ د بحث لپاره یو "عملي اساس" بللی دی. تمه کیږي چې رسمي مذاکرات ډېر ژر په اسلام‌اباد کې پیل شي، ترڅو یوې پراخې او اوږدمهاله سولې ته لاره هواره شي.