د روسیې پخواني ولسمشر دیمیتري میدویدیف د لنډ او منځني واټن اټومي توغندیو د ځای پر ځای کولو په اړه د موقتي بندیز څخه د مسکو د وتلو پړه د ناټو پر هېوادونو اچولې ده.

میدویدیف، چې اوس مهال د روسیې د امنیت شورا مرستیال رئیس دی، د دوشنبې په ورځ په "ایکس" کې وویل: "د منځني او لنډ واټن توغندیو د ځای پر ځای کولو د موقتي بندیز څخه د وتلو په اړه د روسیې د بهرنیو چارو وزارت اعلامیه د ناټو هېوادونو د روس ضد سیاست پایله ده."

هغه زیاته کړه: "دا یوه نوې حقیقت دی چې زموږ ټول مخالفین به ورسره حساب وکړي. د نورو ګامونو تمه وکړئ."

د هغه څرګندونې وروسته له هغې شوي دي چې  د روسیې د بهرنیو چارو وزارت اعلان وکړ چې مسکو نور د منځني واټن اټومي ځواکونو  تړون له مخې په خپلو پخوانیو محدودیتونو ځان پابند نه ګڼي.

د ۱۹۸۷ کال دغه تړون د امریکا او پخواني شوروي اتحاد څخه غوښتنه وکړه چې د ۵۰۰ څخه تر ۵۵۰۰ کیلومترو په واټن کې د ټولو ځمکنیو بالستیک او کروز توغندیو له منځه وړلو او دایمي بندیز ته غاړه کېږدي.

‘ډېر، ډېر احتیاط وکړئ’

د امریکا ولسمشر ډونالډ ټرمپ د خپلې لومړۍ دورې پر مهال په ۲۰۱۹ کال کې له دې تړون څخه د روسیې د سرغړونې په تور ووت، په داسې حال کې چې روسیې دغه تورونه رد کړل.

د دوشنبې په ورځ مسکو وروسته له هغې دا اعلان وکړ چې تېره اوونۍ ټرمپ  روسیې ته نږدې د دوو امریکایي اټومي اوبتلونو د ځای پر ځای کولو امر وکړ، چې دا د میدویدیف سره د ټولنیزو رسنیو پر سر د تندو خبرو اترو په ځواب کې و.

د کریملین ویاند دیمیتري پسکوف د دوشنبې په ورځ وویل چې روسیه د اټومي مسایلو اړوند هر ډول څرګندونو په اړه "ډېر احتیاط" کوي او په دې برخه کې یوه "مسؤلانه دریځ" خپلوي.

پسکوف خبریالانو ته وویل: "روسیه د اټومي نه خپرېدو موضوع ته ډېر پام کوي. او البته، موږ باور لرو چې هرڅوک باید د اټومي بیانونو په اړه ډېر، ډېر احتیاط وکړي."

ټرمپ ګواښ وکړ چې که روسیه په اوکراین کې خپله جګړه پای ته ونه رسوي، بندیزونه به پرې ولګوي، او د یکشنبې په ورځ یې وویل چې ځانګړی استازی یې سټیو ویتکوف به د امریکا د بندیزونو د وروستۍ نېټې څخه مخکې دا اوونۍ روسیې ته سفر وکړي.