رحمه ورلډوایډ، چې په امریکا کې میشته خیریه اداره ده، د اسرائيلو ملاتړ لرونکي او لانجمنې غزې بشري مرستې بنسټ (GHF) تورن کړی چې د دوی مرسته یې نیولې او د دوی لوګو یې د اجازې پرته کارولی ده.

رحمه په خپل فیسبوک بیان کې چې د پنجشنبې په ورځ خپور شو، ویلي چې دوی څلور ورځې انتظار کړی ترڅو ۴۰۰۰ د خوراکي توکو بکسونه او ۱۶ کانټینره غنم غزې ته انتقال کړي، خو دوی ونه توانېدل چې دا مرسته اړمنو خلکو ته ورسوي.

د خیریه ادارې په وینا، GHF د دې مرستو مسؤلیت په غاړه واخیست او وویل چې دوی به د وېش په برخه کې مرسته وکړي، خو رحمه دا وړاندیز رد کړ.

رحمه د پنجشنبې په ورځ د ګارډین ورځپاڼې ته په یوه بیان کې هم وویل چې د خوراکي توکو د بکسونو انځورونه چې د دوی لوګو پرې ښکاري، پرته له دې چې رحمه په مستقیم ډول ورسره تړاو ولري، خپاره شوي دي.

دغه انځورونه چې د GHF د مطبوعاتي موادو برخه هم وه، د رحمه او د دوی د همکارې ادارې، هیرویک هارټس، لوګوګانې پکې شاملې وې.

د غزې بشري مرستې بنسټ (GHF) له خپل تاسیس راهیسې له لانجو سره مخ دی. ډېری بشري مرستې ادارې، په شمول د ملګرو ملتونه، له دې بنسټ څخه ځان لرې ساتلی، په دې دلیل چې دا ډله د بشري اصولو خلاف عمل کوي او مرستې محدودوي.

‘ ګډوډي او بې عزتي’

د غزې بشري مرستې بنسټ (GHF) د سه شنبې په ورځ په جنوبي غزه کې د مرستو د وېش په مرکز کې خپل فعالیتونه پیل کړل.

د فلسطیني کډوالو لپاره د ملګرو ملتونو د ادارې (UNRWA) مشر، فیلیپ لازاریني، وویل: "موږ د لوږو خلکو هغه حیرانوونکي انځورونه لیدلي چې د خوراک لپاره کټاري پر وړاندې ټېل وهي. دا یوه ګډوډه، بې عزته او ناامنه صحنه وه."

د ملګرو ملتونو د بشري چارو د همغږۍ دفتر (OCHA) خبرداری ورکړی چې د GHF لخوا د مرستو وېش د غزې د عاجلو بشري اړتیاوو څخه پام اړوي، لکه دوامداره لاسرسی، خوندي شرایط او د بیړنیو مرستو د چټک تصویب اړتیا.

د بشري حقونو ډلو اسرائيل تورن کړی چې په قصدي ډول د غزې فلسطینیان د لوږې سره مخ کوي او خوراک د جګړې د وسلې په توګه کاروي.

اسرائيل د مارچ له دویمې نېټې راهیسې د غزې لارې د خوراکي، طبي او بشري مرستو لپاره تړلې ساتلي، چې په دې سیمه کې یې د بشري کړکېچ کچه نوره هم ژوره کړې ده. دې کړکېچ د غزې د ۲.۴ میلیونه اوسېدونکو ژوند اغېزمن کړی دی.