غیرقانوني مېشت ځایونو اوسیدونکو د لویدیځې غاړې په مرکزي برخه کې د یوه جومات د ښځو د لمانځه ځای ته اور واچاوه او پر دېوالونو یې په عبراني ژبه شعارونه ولیکل.
سیمه ییزو سرچینو "انادولو" خبري اژانس ته ویلي چې غیرقانوني اسرائیلي مېشت ځایونو اوسیدونکو د چهارشنبې په ورځ وختي د اشغال شوې لویدیځې غاړې په مرکزي برخه کې د "جلیلیه" (Jiljilya) کلي د یوه جومات د ښځو د لمانځه تالار ته اور واچاوه او پر دېوالونو یې په عبراني ژبه شعارونه ولیکل.
د سرچینو په وینا، د غیرې قانوني اسرائیلي مېشت ځایونو اوسیدونکو یوې ډلې د سهار وختي پر مهال پر کلي برید وکړ او جومات ته یې اور واچاوه. دغه اور د ښځو د لمانځه ځای په بشپړ ډول ویجاړ کړی او د جومات بهرنۍ برخې ته یې هم زیان اړولی دی.
ویل کیږي چې په جلیلیه کلي کې پدې وروستیو کې د غیرې قانوني اسرائیلي مېشت ځایونو اوسیدونکو بریدونه زیات شوي دي. تېره میاشت هم د غیرې قانوني اسرائیلي مېشت ځایونو اوسیدونکو پر دغه کلي برید کړی و او له فلسطیني اوسېدونکو څخه یې د پسونو یوه رمه غلا کړې وه.
د ۲۰۲۳ کال په اکتوبر کې پر غزه د اسرائیلو د نسل وژنې د جګړې له پیل راهیسې، په اشغال شوې لویدیځه غاړه کې د اسرائیلي پوځ او غیرقانوني مېشت ځایونو د اوسیدونکو لخوا پر فلسطینیانو او د هغوی پر مالونو بریدونه خورا زیات شوي دي. په دې بریدونو کې قصدي اور اچول، د ځمکو غصب او کروندګرو ته خپلو ځمکو ته د لاسرسي اجازه نه ورکول شامل دي، په ځانګړې توګه هغه سیمې چې د اسرائیلي مېشت ځایونو ته نږدې پرتې دي.
د رسمي فلسطیني شمېرو له مخې، له هغه وخت راهیسې په اشغال شوې لویدیځه غاړه کې د تاوتریخوالي له امله ۱۱۶۹ فلسطینیان وژل شوي، ۱۲۶۶۶ ټپیان شوي، شاوخوا ۲۳۰۰۰ کسان نیول شوي او ۳۳۰۰۰ نور بې ځایه شوي دي.
