د سیډني ساحل په ډزو کې د وژل شویو کسانو شمېر ۱۶ ته لوړ شول.
د پولیسو چارواکي وايي یو شکمن کس وژل شوی، او بل په نازک حالت کې دی.
د اسټرالیا د نیو ساوت ویلزایالت په سیډني ښار کې د بونډي په ساحل کې د یو وسله وال برید وروسته د وژل شویو کسانو شمېر ۱۶ ته لوړ شوی، په داسې حال کې چې شاوخوا ۴۰ تنه نور ټپیان په روغتون کې دي.
پولیسو د یکشنبې په ورځ په خپله ایکس پاڼه (پخوانی ټویټر) لیکلي: "نور معلومات به ډیر ژر شریک شي."
د نیو ساوت ویلز د پولیسو کمیشنر مېل لینیون دا ډله ییزه وژنه "یوه ترهګریزه پېښه" وبلله. د دغه ایالت لومړي وزیر کریس مینز وویل چې دا برید "د یهودي ټولنې د په نښه کولو لپاره طرحه شوی و."
د پولیسو د یوې اعلامیې له مخې، "یو سړی چې ګمان کیږي یو له بریدګرو څخه و" د وژل شویو په ډله کې دی. دویم شکمن بریدګر په روغتون کې په نازک حالت کې دی. په ټپیانو کې دوه پولیس هم شامل دي.
په اعلامیه کې ویل شوي چې "په سیمه کې یو شمېر شکمن توکي موندل شوي چې د متخصصینو لخوا تر څېړنې لاندې دي، او سیمه کې څیړنې دوام لري."
اعلامیه زیاتوي: "د جرم یوه پراخه صحنه جوړه شوې، او اوس څېړنې روانې دي. په سیډني کې د دې پېښې سره د تړاو په اړه د کومې بلې پېښې راپور نه دی ورکړل شوی."
