ټرمپ وايي له کاناډا سره ټولې سوداګریزې خبرې 'پای ته ورسېدې

ټرمپ پر کاناډا تور لګوي چې د تعرفو پر ضد په یوه تبلیغاتي کمپاین کې یې د پخواني ولسمشر رونالډ ریګن خبرې په ناسم ډول نقل کړې دي.

د امریکا ولسمشر ډونالډ ټرمپ ویلي، چې له کاناډا سره ټولې سوداګریزې خبرې سمدستي پای ته رسوي او پر هغوی یې تور لګولی، چې د تعرفو پر ضد په یوه تبلیغاتي کمپاین کې یې د پخواني ولسمشر رونالډ ریګن خبرې په غلطه توګه راخیستې دي.

ټرمپ د پنجشنبې په ورځ په خپله ټروت ټولنیزه شبکه کې وویل: "د دوی د ناوړه چلند پر بنسټ، له کاناډا سره ټولې سوداګریزې خبرې اترې په دې توګه پای ته رسول کېږي."

"د رونالډ ریګن بنسټ همدا اوس اعلان وکړ چې کاناډا په درغلي سره یو اعلان کارولی، چې جعلي دی، او په هغه کې رونالډ ریګن د تعرفو په اړه منفي خبرې کوي."

د شمالي امریکا د ګاونډیانو ترمنځ په اړیکو کې دا وروستی غیر معمولي بدلون یوازې دوه اونۍ وروسته له هغه راځي چې د کاناډا لومړي وزیر مارک کارني په سپینه ماڼۍ کې له ټرمپ سره وکتل ترڅو د امریکا د سختو تعرفو د کمولو غوښتنه وکړي.

د رونالډ ریګن بنسټ په اېکس (پخواني ټویټر) کې ویلي چې د کاناډا د اونټاریو ایالت حکومت د ۱۹۸۷ کال په اپریل میاشت کې د سوداګرۍ په اړه د ریګن د یوې راډیویي وینا "غږ او ویډیو په انتخابي ډول" کارولې ده.

بنسټ ویلي چې دغه اعلان د جمهوري غوښتونکي پخواني اداکار وینا "په ناسم ډول وړاندې کوي" او زیاته یې کړه چې "په دې اړه پر خپلو قانوني اختیارونو غور کوي."