ناټو: د تورکيې دفاعي صنعت بايد له اروپا او متحدينو سره لا نږدې اړیکي ولري.
د ناټو عمومي منشي مارک روته د تورکیې د دفاعي صنعت بنسټ ستاینه وکړه او ویې ویل چې د دې هېواد دفاعي صنعت باید د بریتانیا، ناروې او اروپایي ټولنې سره نږدې اړیکې ولري.
روته د سه شنبې په ورځ په هاګ کې د ناټو عامه فورم ته وویل: "تورکیه یو ډېر لوی دفاعي صنعتي بنسټ لري. کله ناکله موږ هېرو چې دوی څه لري. ما د دوی ځینې شرکتونه لیدلي، دا واقعاً د پام وړ دي."
هغه زیاته کړه: "موږ باید ډاډ ترلاسه کړو چې د تورکیې دفاعي صنعتي بنسټ د بریتانیا، ناروې او اروپایي ټولنې سره تر ممکنه حده نږدې اړیکې ولري."
روته د ناټو په چوکاټ کې د دفاعي همکارۍ پر بنسټ د داخلي وېشونو د رامنځته کېدو په اړه خبرداری ورکړ او ویې ویل: "راځئ چې د ناټو دننه دا ډول خنډونه جوړ نه کړو. دا به مرسته ونه کړي."
د ناټو د ۳۲ غړو هېوادونو مشران د جون په ۲۴-۲۵ نېټه په هاګ کې د یوې مهمې غونډې لپاره راټولېږي، چې په کې د دفاعي لګښتونو زیاتولو او د اوکراین د غړیتوب غوښتنې په اړه بحثونه کېږي.
