د امریکا مرکزي قوماندانۍ سنتکام وايي چې د ولسمشر ټرمپ د حکم پر بنسټ یې د ایران په ساحلي ښارونو بندر عباس، سیریک او میناب کې د دقیقو هوايي بریدونو نوې څپې بشپړې کړې دي.
د امریکا مرکزي قومانداني (سنتکام) اعلان وکړ چې په ایران کې دننه یې پر څو نورو اهدافو اضافي بریدونه بشپړ کړي دي.
پوځ په یوه اعلامیه کې وویل: "د سنتکام ځواکونو په ټول ایران کې د ایران پر نظامي څارونکو وړتیاوو، مخابراتي سیسټمونو او د هوايي دفاع پر سایټونو بریدونه وکړل."
"د امریکا د سمندري پلیو ځواکونو ، هوايي ځواک او سمندري بېړیو پر هغو ایراني اهدافو دقیق بریدونه کړي چې د امریکا ځواکونو او په سیمه ییزو اوبو کې نړیوالو سوداګریزو کښتیو ته یې ګواښ رامنځته کاوه."
دا بریدونه، چې د ولسمشر ډونالډ ټرمپ په لارښوونه ترسره شول، وروسته له هغه وشول چې ایران د روانې اونۍ په پیل کې د هرمز تنګي په سر د امریکا د پوځ یوه اپاچي هلیکوپټره راغورځولې وه.
سنتکام زیاته کړه: "دا بریدونه د ایران د بې ځایه او دوامداره تېري په ځواب کې دي. امریکایي ځواکونه بیداره، وژونکي او چمتو دي."
لويې چاودنې
تر دې وړاندې، امریکايي ځواکونو په ایران کې پر څو اهدافو د بریدونو نوې لړۍ پیل کړه ترڅو د هغه څه مخه ونیسي چې دوی یې "روانه دښمني" بولي.
د دولتي خبري اژانس "مهر" په وینا، د اعلان څخه لږ وروسته په بندر عباس او سیریک کې د نویو چاودنو راپورونه ورکړل شول، او د هرمزګان ولایت په سویل کې میناب ته نږدې بله چاودنه هم اورېدل شوې ده.
دا وروستي بمبارونه په سیمه کې د یوې ورځې دوامداره نظامي فعالیتونو وروسته ترسره شول. مهر راپور ورکړی چې د فارس ښار څخه بهر یو لړ چاودنې د هوايي دفاع سیسټمونو د فعالېدو پایله وه. د تهران په لوېدیځ کې هم د هوايي دفاع فعالیت اورېدل شوی، په داسې حال کې چې ځینې چاودنې له لیرې د کیش ټاپو ته نږدې تر غوږو شوې دي.
ټرمپ او هیګست د سختو بریدونو ژمنه کړې وه
د چهارشنبې په ورځ، د امریکا د دفاع وزیر پیټ هیګست خبرداری ورکړ چې واشنګټن به ډېر ژر په ایران کې "مهم تاسیسات" بمباري کړي.
هیګست په فلوریډا کې د امریکا د مرکزي قوماندانی له مرکزي دفتر څخه بهر وویل: "مرکزي قومانداني به نن شپه بوخته وي ځکه چې ولسمشر ټرمپ ویلي موږ به پر ایران سخت بریدونه وکړو، او موږ به یې وکړو." هغه زیاته کړه: "ایران چانس لري چې یوه ښه معامله وکړي... خو پر ځای یې، پر دوی به د امریکا لخوا په مهمو تاسیساتو باندې بمونه ورول شي."
ولسمشر ډونالډ ټرمپ هم د چهارشنبې په ورځ وویل چې د جګړې د پای ته رسولو لپاره په خبرو اترو کې د کافي پرمختګ نه شتون له امله به امریکا پر ایران بریدونه بېرته پیل کړي.
ټرمپ په بیضوي دفتر کې وویل: "موږ به پر هغوی بریدونه وکړو، ډېر سخت بریدونه به وکړو." هغه خبریالانو ته وویل چې د ایران لخوا د امریکا د اپاچي هلیکوپټرې راغورځول د دې کار لپاره لازم پلمه برابروي.
ټرمپ له تهران سره د روانو سوله ییزو خبرو اترو د سست رفتار له امله خپله ژوره ناهیلي څرګنده کړه او ویې ویل: "ما له څو میاشتو راهیسې له ایران سره کار کړی دی. هغوی باید تړون لاسلیک کړي. دا یو ښه تړون دی. زه نه پوهیږم هغوی څه کوي."
