فرانسوي چارواکو پر دوو ښځو د بشري مرستو د مخنیوي په تور د نیولو حکم صادر کړی چې غزې ته یې د رسیدو مخه نیولې وه.
یوې حقوقي سرچینې ویلي، چې د فرانسې چارواکو د دوو فرانسوي-اسرائیلي اتباعو د نیولو امر "د نسل وژنې په جرم کې د ښکیلتیا" په تور صادر کړی، ځکه چې دوی غزې ته د بشري مرستو د ننوتلو د مخنیوي هڅه کړې ده.
پلټنو ته نږدې یوې سرچینې د فرانسې خبري اژانس ته ویلي، چې دا حکمونه د تېر کال په جولای میاشت کې د "اسرائیل د تل لپاره" ډلې غړې نیلي کوپفر-ناوري او د "تساو ۹" ډلې غړې راشل ټویټو لپاره صادر شوي وو، چې یو فرانسوي رسنیز راپور یې هم پخلی کړی دی. دا حکمونه له دوی غواړي چې د یوې څیړونکې قاضي په وړاندې حاضر شي، خو د دوی د توقیف غوښتنه نه کوي.
د هغو نادولتي موسسو د وکیل په وینا چې تېر کال یې دا شکایت کړی و، دا لومړی ځل دی چې د بشري مرستو خنډول د "نسل وژنې په جرم کې د ښکیلتیا" په توګه څیړل کیږي.
دا جوړه تورنه ده چې د ۲۰۲۴ کال د جنورۍ او نوامبر ترمنځ یې غزې ته د مرستندویه لارۍ د ننوتلو د مخنیوي هڅه کړې، په شمول د تېر کال په مې میاشت کې د نیتزانا او کرم شالوم په لارو کې.
سرچینې زیاته کړه، دا دوه فعالانې "نسل وژنې ته د عامه هڅونې" په تور هم شکمنې دي، ځکه چې دوی غزې ته د مرستو د رسیدو د مخنیوي غوښتنه کړې وه.
پلټنو ته یوې بلې نږدې سرچینې ویلي، چې ښايي د شاوخوا ۱۰ نورو کسانو لپاره هم د نیولو حکم صادر شي.
دا شکایتونه د بشري حقونو لپاره د فلسطین مرکز او د الحق او المیزان حقوقي ډلو لخوا ثبت شوي وو. د دوی وکیلې، کلیمینس بیکټارټ وویل، دا د نسل وژنې د قانون له مخې د خپل ډول لومړنۍ پلټنه ده.
