کابل له امریکا وغوښتل چې د افغانستان ځمکنۍ بشپړتیا ته ګواښ ونه کړي
کابل د یکشنبې په ورځ له امریکا وغوښتل چې د افغانستان ځمکنۍ بشپړتیا ته "ګواښ" پېښ نه کړي، وروسته له هغه چې ولسمشر ډونالډ ټرمپ خبرداری ورکړ چې که د طالبانو حکومت د بګرام هوايي اډې کنټرول پنټاګون ته ونه سپاري نو "بدې پېښې" به رامنځته شي.
د طالبانو حکومت مرستیال ویاند حمدالله فطرت پر اېکس شبکه لیکلي: "په ټولو دوه اړخیزو خبرو اترو کې امریکا ته په پرله پسې توګه ویل شوي چې د اسلامي امارت لپاره د افغانستان خپلواکي او ځمکنۍ بشپړتیا خورا ډېر اهمیت لري."
هغه وویل چې د ۲۰۲۰ کال د دوحې تړون له مخې، امریکا ژمنه کړې وه چې "د افغانستان د ځمکنۍ بشپړتیا یا سیاسي خپلواکۍ پر وړاندې به ځواک نه کاروي او نه به یې ګواښي، او نه به یې هم په کورنیو چارو کې لاسوهنه کوي."
د طالبانو او د ټرمپ د لومړۍ ادارې ترمنځ د ۲۰۲۰ کال د تړون له مخې، ټولو بهرنیو ځواکونو تر ۲۰۲۱ کال پورې افغانستان پرېښود، چې له هغې وروسته طالبانو یو سرپرست حکومت جوړ کړ چې اوس پر دغه جګړه ځپلي هېواد واکمني کوي.
فطرت له امریکايي لوري وغوښتل چې "خپلو (د دوحې) ژمنو ته ژمن پاتې شي" او له واشنګټن یې وغوښتل چې "د پخوانیو ناکامو تګلارو د تکرار" پر ځای "د حقیقت پالنې او معقولیت" تګلاره خپله کړي.
د کابل دا څرګندونې وروسته له هغه وشوې چې ټرمپ د شنبې په ورځ په ټروت ټولنیزه شبکه کې په یو خبرداري کې وویل: "که افغانستان د بګرام هوايي اډه هغوی ته چې جوړه کړې یې ده، یعنې د امریکا متحده ایالاتو ته، بېرته ونه سپاري، نو بدې پېښې به وشي!!!"
بګرام چې د کابل په شمال کې موقعیت لري، په ۲۰۲۱ کال کې د واشنګټن له بشپړ وتلو مخکې، پر افغانستان د شل کلن یرغل پر مهال د امریکا تر ټولو لویه پوځي اډه وه.
