په داسې حال کې چې د شمالي افریقا په خاوره کې د اسپانیا تر ولکې لاندې سیمې "سیوټا" ته د کډوالو لوی بهیر په کمېدو دی، له هغو ۵۰ زرو څخه ډېرو کسانو چې د ځمکې او سمندر له لارې له پولې اوښتي وو، ډېری یې بېرته په خپله خوښه مراکش ته ستانه شوي دي.

د اسپانیا د کورنیو چارو وزارت د جمعې په ورځ اعلان وکړ چې د پنجشنبې له سهار راهیسې شاوخوا ۵۰ زره کسانو له پولې تېر شوي او اټکل کېږي چې د جمعې ورځې تر مازدیګر ۶:۰۰ بجو پورې ۴۸ زره او ۳۰۰ کسان بېرته ستانه شوي وي.

د سیوټا د سيمه ييز حکومت مشر، خوان جیسس ویواس وویل چې په وروستیو څو ورځو کې تر ۶۰ زرو پورې کسان له پولې په اوښتلو سره دغه سیمې ته داخل شوي دي.

په سیوټا کې د اسپانیا د حکومت استازي د جمعې په ورځ وویل چې د پولې په اسپانوي لور کې د ۵۷ کسانو جسدونه موندل شوي او ښایي د مراکش په لور کې هم نور کسان مړه شوي وي.

ویل شوي چې ځینې کسان په اوبو کې ډوب شوي او ځینې نور بیا د پولې پر کټارې او د څپو ماتونکي دپاسه د ختلو پر مهال د ګڼې ګوڼې له امله تر پښو لاندې شوي او مړه شوي دي.

مراکشي ځواکونو د سیوټا په دروازو کې راټول شوي خلک د ډنډو او اوښکې بهونکي ګاز په واسطه تیت او پرک کړل، ترڅو د هغو کسانو مخه ونیسي چې غوښتل یې د منځنۍ بحیرې په غاړه دغې کوچنۍ اسپانوي سیمې ته داخل شي.

په پوله کې د کډوالو دغه بهیر په اروپا کې د نظر اختلافونه رامنځته کړي دي؛ د اروپايي ټولنې د نورو هېوادونو مشرانو له اسپانیې وغوښتل چې وضعیت تر کنټرول لاندې راولي.

ایټالیا په یوه داسې پرېکړه کې چې ښایي د دواړو هېوادونو ترمنځ پر الوتکو او کښتیو سفر کوونکي اغېزمن کړي، اعلان وکړ چې له اسپانیې سره یې د "شینګین" (Schengen) هغه تړون وځنډاوه چې د اروپايي ټولنې د غړو هېوادونو ترمنځ د سرحدي کنټرولونو د لیرې کولو غوښتنه کوي.

مادرید بیا وویل چې د ایټالیا دا ګام د اروپايي ټولنې له تړونونو څخه سرغړونه ده.