دا اعلان د الجزایر د بهرنیو چارو وزارت وکړ.
د الجزایر د بهرنیو چارو وزارت لخوا په خپره شوې خبرپاڼه کې د دې خبرې په ټینګار سره ویل شوي دي چې د دواړو هېوادونو ترمنځ د اړیکو د ساتلو ټولې لارې چارې ختمې شوې دي او له اماراتو سره ډیپلوماټیکې اړیکې د شلولو پریکړه کړې ده .
په خبرپاڼه کې راغلي دي "د متحدو عربي اماراتو د زیاتېدونکو پاروونکو او دښمنانو اقداماتو پر وړاندې، الجزایر په خورا زغم او لوړ مسؤلیت احساس سره عمل کړی دی. د دولتونو ترمنځ د اړیکو پر حاکمو اصولو د پوره درناوي په روحیې سره، د اماراتو لوري د پام جلبولو او د دغو تأسف بارو او ناحقه چلندونو د خطرناکو پایلو په اړه هغوی ته د خبرداري ورکولو لپاره له هیڅ ډول هڅې ډډه نه ده شوې."
په خبرپاڼه کې زیاته شوې چې له متعددو خبرداریو سره سره اماراتو خپلو دغو کړنو ته دوام ورکړی، او ویل شوي چې نوموړي اقدامات "د دوو خپلواکو دولتونو ترمنځ د اړیکو په چوکاټ کې له هغو حدونو او پولو وتلي چې د زغملو، منلو یا بې ځوابه پرېښودلو وړ وي."
په دې برخه کې وویل شول چې د دوه اړخیزو اړیکو د خوندیتوب ټولې لارې چارې پای ته رسېدلې او د الجزایر حکومت پرېکړه کړې چې له متحدو عربي اماراتو سره ډیپلوماټیکې اړیکې وشلوي.
په خبرپاڼه کې ویل شوي چې د یادې پرېکړې د رسمي ابلاغ په موخه په الجزایر کې د اماراتو سفیر نن د بهرنیو چارو وزارت ته ورغوښتل شوی و، او سفیر ته پر پرېکړې د عمل کولو او له هېواده د وتلو لپاره ۴۸ ساعته وخت ورکړل شوی دی.
الجزایر د ۲۰۲۶ کال په فبرورۍ کې اعلان کړی و چې له اماراتو سره یې د هغې هوایي خدماتو د هوکړهلیک د لغوه کولو رسمي پړاوونه پیل کړي چې په ۲۰۱۳ کال کې امضا شوی و.
متحدو عربي اماراتو د الجزایر د دې پرېکړې په اړه تر اوسه څه نه دي ویلي.
د الجزایر ولسمشر عبدالمجید تبون تېر کال په اکتوبر کې ویلي وو چې له یوه هېواد پرته له ټولو خلیجي هېوادونو سره د دغه هېواد اړیکې تودې دي؛ دا خبرې د اماراتو لوري ته په اشارې او کنایې تعبیر شوې وې.
تبون له سعودي عربستان، کویټ، عمان او قطر سره اړیکې "ورورګلویزه" بللې وې.
عبدالمجید تبون هغه مهال ویلي وو که الجزایر په عربي نړۍ کې د "دوه ګونیو او وېشلو د ژورېدو" مخنیوي هڅه نه وی کړې، دا ډیپلوماټیکه شلېدنه به "خورا پخوا رامنځته شوې وای."
