د یوه راپور له مخې چې د چارواکو پر حواله خپور شوی، ولیعهد محمد بن سلمان په سوډان او یمن کې د متحده عربي اماراتو د پالیسیو په اړه خپلې ګیلې په ګوته کړې دي.
د "مډل ایسټ ای" خبري سرچینې د جمعې په ورځ د خپاره شوي راپور له مخې، د سعودي عربستان ولیعهد محمد بن سلمان یوه جګپوړي اماراتي چارواکي ته یو اوږد لیک لېږلی او په سوډان او یمن کې یې د متحده عربي اماراتو د رول په اړه د ریاض ګیلې په ډاګه کړې دي.
دغې سرچینې د ګڼو امریکايي او لوېدیځو چارواکو پر حواله راپور ورکړی چې سعودي ولیعهد په دې وروستیو کې د متحده عربي اماراتو د ملي امنیت سلاکار، طحنون بن زاید ته لیکلی، په دغو دوو کړکېچنو سیمو کې یې د ابوظبۍ د پالیسیو په اړه اندېښنې راپورته کړې او د منځګړیتوب غوښتنه یې کړې ده.
په دغه لیک کې، چې څو اونۍ مخکې لېږل شوی، د سوډان په روانه کورنۍ جګړه او ګاونډي هېواد یمن کې د اماراتو د فعالیتونو په اړه د سعودي د شکایتونو یو مفصل لیست شامل و. په لیک کې د ولیعهد د ورور او د دفاع وزیر، خالد بن سلمان له لارې د منځګړیتوب وړاندیز هم شوی دی.
د راپور له مخې، په پیغام کې ویل شوي چې ریاض نور د سوډان د کورنۍ جګړې دوام "نشي زغملی"، په داسې حال کې چې متحده عربي امارات له نیمه پوځي "چټک غبرګون ځواکونو" څخه ملاتړ کوي.
لیک په یمن کې د سعودي عربستان پوځي مداخله د ملي امنیت لپاره اړینه بللې او بیا یې ټینګار کړی چې دا پاچاهي یمن د خپل نفوذ ساحه ګڼي او پلان لري چې د خپلې سویلي پولې پر سر د دغه جګړه ځپلي هېواد "مسؤلیت" پر غاړه واخلي.
په راپور کې د یادو شویو چارواکو په وینا، سعودي عربستان دا لیک له امریکا سره هم شریک کړی دی. نه سعودي عربستان او نه هم متحده عربي اماراتو د دغه راپور شوي لیک په اړه په عامه توګه څه ویلي دي.
