د فرانسې د بهرنیو چارو وزیر ویلي چې هېواد یې د اسرائیلو د مالیې پر افراطي ښي اړخي وزیر، بېزلیل سموتریچ، فرانسې ته پر ننوتلو بندیز لګولی دی. دا اقدام له نورو هېوادونو سره په همغږۍ د اشغال شوې لوېدیځې غاړې د فلسطینیانو په وړاندې د مېشتو یهودانو د تاوتریخوالي په غبرګون کې شوی دی.

د فرانسې د بهرنیو چارو وزیر، ژان نوئل بارو، د سې شنبې په ورځ وویل چې دا بندیزونه له بریتانیا، کاناډا، اسټرالیا، ناروې او نیوزیلنډ سره په همغږۍ پر هغو کسانو لګول شوي چې "په لوېدیځه غاړه کې د مېشت ځایونو د جوړولو د فعالیتونو او تاوتریخوالي د زیاتوالي مسؤل دي."

هغه وویل چې سموتریچ په فعاله توګه "د لوېدیځې غاړې د ضمیمه کولو (تړلو) هڅه کوي چې په ښکاره یې ادعا هم کوي، همدارنګه په لوېدیځه غاړه کې د نویو مېشت ځایونو جوړول، د غزې بیا مستعمره کول او د فلسطیني ادارې اقتصادي پاشل هڅوي چې د فلسطیني ولس لپاره ناوړه پایلې لري."

بارو پر اېکس (X) پاڼه ولیکل: "دا هغه پالیسي ده چې د نړیوالې ټولنې غوڅ اکثریت، چې د دوو دولتونو حل لارې ته ژمن دی، نشي منلی."

سموتریچ د اسرائیلو د حکومت دویم غړی دی چې په وروستیو میاشتو کې فرانسې ته له ننوتلو منع کېږي. تر دې وړاندې د مې په ۲۳مه د ملي امنیت پر وزیر اتیامار بن ګویر هم د هغو فعالانو د ملنډو وهلو له امله بندیز لګول شوی و چې د اسرائیلي سرتېرو له خوا نیول شوي او ناوړه چلند ورسره شوی و.

فرانسې همدارنګه د مېشتو یهودانو د سازمانونو پر څلورو مشرانو او ۲۱ هغو غیرقانوني مېشتو یهودانو هم بندیز ولګاوه چې په تاوتریخوالي کې ښکېل وو.

ناڅیزه حساب کتاب

ناروې ویلي چې د هغو بندیزونو ملاتړ کوي چې اروپايي ټولنې د مې په ۲۸مه اعلان کړي وو او پر ۲۰ "تاوتریخجنو مېشتو یهودانو" به د ننوتلو بندیز ولګوي.

بریتانیا هم پر هغو شبکو د بندیزونو ترڅنګ چې په لوېدیځه غاړه کې پر فلسطینیانو د بریدونو مالي ملاتړ کوي، له خپلو سوداګرو او وګړو غوښتي چې په هغو اسرائیلي مېشت ځایونو کې له مالي فعالیتونو ډډه وکړي چې د نړیوالو قوانینو له مخې غیرقانوني ګڼل کېږي.

د بریتانیا د بهرنیو چارو وزیرې، ایویټ کوپر، پارلمان ته وویل: "موږ باور لرو چې د مېشتو یهودانو تاوتریخجنې ډلې باید له هغو ځمکو ګټه پورته نه کړي چې له فلسطینیانو یې غصب کړې دي." هغې زیاته کړه چې د اسرائیلو حکومت د ځینو مېشتو یهودانو تاوتریخوالی غندلی، خو دا غندنه هغه مهال بې مانا ده چې حساب کتاب ورسره نه کېږي.

تېر کال پنځو هېوادونو پر بن ګویر او سموتریچ د فلسطینیانو پر وړاندې د تاوتریخوالي پارولو د تورونو له امله بندیزونه لګولي وو، په داسې حال کې چې هسپانیې، سلوانیا او په دې وروستیو کې ایرلنډ هم پر دغو وزیرانو ورته بندیزونه لګولي دي.