د تورکیې او ایران لوړ پوړو استازو په استانبول کې د راتلونکو اټومي خبرو اترو په اړه خبرې وکړې.

د تورکیې د بهرنیو چارو وزیر هاکان فیدان او ایران د بهرنیو چارو وزیر عباس عراقچي د جمعې د ورځې د خبرو اترو لپاره د چمتووالي په اړه ټیلیفوني خبرې وکړې، او همدارنګه په غزه او سوریه کې پرمختګونه هم وڅیړل.

د تورکیې د بهرنیو چارو وزیر هاکان فیدان او د هغه ایراني سیال عباس عراقچي د جمعې په ورځ په استانبول کې د راتلونکو اټومي خبرو اترو په اړه د تیلیفون له لارې خبرې وکړې.

د تورکیې ډیپلوماتیکو سرچینو وویل چې د دوشنبې په ورځ د تیلیفون په جریان کې، دوی په غزه کې د بشري وضعیت او په سوریه کې د پرمختګونو په اړه هم خبرې وکړې.

ټاکل شوې ده چې د ايران او درې اروپايي هېوادونو (بریتانیا، فرانسه، او جرمني) ترمنځ د اټومي خبرو نوې دوره د جمعې په ورځ په استانبول، کې ترسره شي.

له دې مخکې، تهران اعلان کړی و چې د سې شنبې په ورځ به د روسیې او چینایي چارواکو کوربه وي ترڅو د خپل اټومي پروګرام په اړه بحث وکړي.

د ايران د بهرنيو چارو وزارت وياند، اسماعیل بقایي، د تهران په يو خبري کنفرانس کې، چې د نیمه رسمي تسنیم خبري اژانس له خوا راپور شوی، وويل: "موږ له دغو دوو هېوادونو سره پرله‌پسې سلا مشورې لرو، ترڅو د سنيپ بک (snapback) فعالېدو مخه ونيسو یا یې پایلې کمې کړو."

د ۲۰۱۵ کال د اټومي تړون له مخې، د "سنيپ بک" بند د تړون لاسليک کوونکو ته اجازه ورکوي چې که ايران له تړون څخه سرغړونه وکړي، نو د ملګرو ملتونو بندیزونه پرې بېرته ولګوي.

بقایي زياته کړه: "موږ دا مهال له امريکا سره د خبرو کوم پلان نه لرو." د تهران او امريکا ترمنځ خبرې د عماني منځګړو له لارې روانې وې، تر هغه چې د جون په ۱۳مه اسرائيلو پر ایران ناڅاپي برید وکړ، چې له امله یې ۱۲ ورځنی جنګ پیل شو.

دغه برید د عمان په پلازمېنه مسقط کې د شپږم پړاو خبرو له پلان شوې نیټې دوه ورځې مخکې وشو.

ايران امريکا د دغه اسرائيلي بريد شريک وباله، چې په ترڅ کې يې د ايران جګ‌پوړي پوځي چارواکي، اټومي ساینسپوهان، او ولسي وګړي ووژل شول. امريکا هم د ايران پر درې مهمو اټومي تأسيساتو بريدونه وکړل او ادعا يې وکړه چې دغه تأسيسات يې له منځه وړي دي. اوربند د جون په ۲۴مه نافذ شو.