د جرمنی په سویل لویدیځ کې د اورګاډي په یوې پيښه کې ګنشمیر کسانو ته مرګ ژوبله اوښتې ده.
د جرمني په سویل لویدیځ کې د پولیسو په وینا یو سیمه ییز مسافر وړونکی اورګاډی د پټلۍ څخه وتلو په پېښه کې درې تنو ژوند د لاسه ورکړی او څو تنه نور ټپیان شوي دي.
پولیسو ویلي دي چې دا پیښه د یکشنبې په ماښام شاوخوا ۶:۱۰ بجې د بادن-وورتمبرګ ایالت د ریډلینګن ښار ته نږدې رامنځته شوه . د پيښې پر مهال په اورګاډي کې شاوخوا ۱۰۰ تنو مسافرو شتون درلود.
چارواکو د ټپیانو د شمېر یا د هغوی د ټپونو د جدي والي په اړه نور جزئیات ندي ورکړي خو د بیلد په نوم ورځپاڼې د بیړنیو خدماتو د کارکوونکو له خولې ویلي چې ۵۰ کسان ټپیان شوي دي.
د آلمان د اورګاډي شرکت دویچه بان د څو کسانو د مړینې او ګڼو نورو د ټپي کېدو پخلی کړی دی. دوی ویلي چې د اورګاډي دوه واګونونه "د نامعلومو دلایلو له امله" له پټلۍ څخه وتلي دي.
چارواکي د پېښې د علتونو د څېړلو په حال کې دي، او د اورګاډي تګ راتګ په دې مسیر کې د ۴۰ کیلومترو په اوږدو کې ځنډول شوی دی.
د آلمان رسنیو راپور ورکړی چې ښایي د ځمکې ښویدو له امله دا پېښه رامنځته شوې وي، ځکه چې په دې سیمه کې سخت طوفانونه راغلي وو.
یاده مسافر وړونکې اورګاډۍ د سیګمارینګن ښار څخه د اولم ښار پر لور روانه وه، کله چې په ځنګلي سیمه کې له پټلۍ څخه ووتله.
د اورګاډي زړې پټلۍ
د آلمان لومړي وزیر فریدریش مرز په ټولنیزو رسنیو کې د وژل شویو کسانو کورنیو ته خپله خواخوږي څرګنده کړه.
هغه وویل: "زه د کورنیو چارو وزیر او د ترانسپورت وزیر سره په نږدې تماس کې یم او له هغوی مې غوښتنه کړې چې د ژغورنې ټیمونو سره د ټولو شته امکاناتو مرسته وکړي."
"موږ د قربانیانو په ویر کې یو. زه د هغوی خپلوانو ته خپله خواخوږي څرګندوم."
د پېښې له ځای څخه اخیستل شوي انځورونه ښيي چې ژیړ او خړ رنګ لرونکي واګونونه په خپلو اړخونو پراته دي، او د اور وژنې او بیړنیو خدماتو کارکوونکي هڅه کوي چې مسافرو ته ځان ورسوي.
د سیمه ییزې ټلویزیوني شبکې SWR په وینا، د ژغورنې چورلکې د پېښې لږ وروسته سیمې ته ورسېدې ترڅو ټپیان روغتونونو ته ولېږدوي، او د نږدې روغتونونو بیړني ډاکټران خبر کړل شول.
د آلمان د ترانسپورت سیستم په پرله پسې ډول د مسافرو لخوا د زړو پټلیو او زیربناوو له امله پرې نیوکه کېږي، چې له امله یې مسافر د اورګاډو د ځنډونو او تخنیکي ستونزو سره مخ کېږي.
حکومت ژمنه کړې چې په راتلونکو کلونو کې به په ځانګړي ډول د زیربناوو د عصري کولو لپاره څو سوه میلیارده یورو پانګونه وکړي.
۲۰۲۲ کال په جون کې د آلمان په سویلي بایرن کې د یوې الپاین سیمې ته نږدې یو اورګاډی له پټلۍ څخه ووت، چې څلور کسان یې ووژل او لسګونه نور یې ټپیان کړل.
د آلمان تر ټولو خونړۍ د اورګاډي پېښه په ۱۹۹۸ کال کې هغه مهال رامنځته شوه کله چې د دویچه بان دولتي شرکت یوه چټکه اورګاډۍ د نیدر ساکسوني په ایښید ښار کې له پټلۍ ووتله، چې ۱۰۱ کسان یې ووژل.
