دا لایحه په استازو جرګه کې د ۲۲۶ موافقو او ۲۱۹ مخالفو رایو په ترلاسه کولو سره تصویب شوه او اوس سنا مجلس ته ځي، چې هلته د پرمختګ لپاره لږترلږه ۶۰ رایو ته اړتیا لري.
د امریکا د استازو جرګې هغه قانون تصویب کړ چې له مخې یې اوکراین ته ۱.۸ میلیارده ډالره اضافي مرسته لېږل کېږي او پر روسیې بندیزونه نور هم سختېږي. دا لایحه د پنجشنبې په ورځ د ۲۲۶ موافقو او ۱۹۵ مخالفو رایو په ترلاسه کولو سره تصویب شوه، چې ۱۸ جمهوري غوښتونکو هم له ډیموکراتانو سره په دې پرېکړه کې برخه واخیسته.
د دې لایحې مشري د استازو جرګې د بهرنیو اړیکو د کمېټې لوړپوړي ډیموکرات غړي، ګریګوري میکس کوله. د دې طرحې پلویان وايي چې دا به له اوکراین سره د پام وړ ملاتړ وکړي او ورسره به د روسیې د تېلو او ګازو پر سکټور او هغو مالي ادارو چې له روسیې سره سوداګري کوي، بندیزونه او محدودیتونه زیات کړي.
دا لایحه به اوس سنا مجلس ته لاړه شي، چې هلته د تصویب لپاره لږترلږه ۶۰ رایو ته اړتیا لري. خو که دا لایحه له دغه خنډه تېره هم شي، بیا هم د امریکا د ولسمشر ډونالډ ټرمپ له خوا د احتمالي ویټو (رد کېدو) له ګواښ سره مخ ده.
سړه او توده لېوالتیا
که څه هم د ۲۰۲۲ کال په فبروري کې د جګړې له پیل وروسته د دواړو ګوندونو ډېری غړو له اوکراین سره کلک ملاتړ کاوه، خو د ۲۰۲۵ کال په جنوري کې سپینې ماڼۍ ته د ټرمپ له بیا ستنېدو وروسته، د هغه نږدې جمهوري غوښتونکو متحدینو — په ګډون د استازو جرګې او سنا د مشرتابه — د کییف په اړه لېوالتیا کمه شوې ده. ولسمشر په خپله دویمه دوره کې د بندیزونو په اړه پرېکړې هم یوازې له سپینې ماڼۍ سره ساتلي، نه له کانګرس سره.
اوکراین ته د امریکا په مرستو کې په داسې حال کې د پام وړ کموالی راغلی چې روسیه او اوکراین یو بل پر توغندیو، بې پیلوټه الوتکو او توپخانې ولي. د سولې خبرې هم په ټپه ولاړې دي، ځکه اوکراین د روسیې د ولسمشر ولادیمیر پوتین هغه غوښتنه رد کړې چې وايي اوکراین باید هغه سیمې وسپاري چې له ۲۰۲۲ کال راهیسې یې په بریالیتوب سره دفاع کړې ده.
د "اوکراین د ملاتړ قانون" کې د جګړې وروسته د دغه هېواد د بیارغونې لپاره اقدامات، له کییف سره د ۱ میلیارډ ډالرو څخه ډېره مرسته او د مستقیمو پورونو له لارې تر ۸ میلیارډ ډالرو پورې ملاتړ شامل دی. دا قانون همدارنګه پر روسیې، د دغه هېواد پر مالي ادارو، د تېلو او کانونو پر سکټورونو او روسي چارواکو باندې سخت بندیزونه او د صادراتو کنټرول هم لګوي.
