اردوغان: له افغانستان سره د نازک اوربند په ترڅ کې به د تورکیې لوړپوړی پلاوی پاکستان ته سفر وکړي
د تورکیې ولسمشر اردوغان وايي، انقره د کابل او اسلام اباد د سولې بهیر له نږدې څاري او جګپوړي چارواکي به یې له افغانستان سره د دایمي سولې لپاره پاکستان ته سفر وکړي.
اردوغان وايي چې تورکیه او پاکستان په بېلابېلو برخو کې د همکاریو د لا پیاوړتیا لپاره کار کوي.
ولسمشر طیب اردوغان وویل، د تورکیې د بهرنیو چارو او دفاع وزیران او د استخباراتو مشر پلان لري چې روانه اونۍ پاکستان ته سفر وکړي، ترڅو په سویلي اسیا کې د اوربند په اړه له افغانستان سره پر ټکنیو خبرو اترو بحث وکړي.
د یکشنبې په ورځ له باکو څخه د راستنېدو پر مهال د هغه د څرګندونو اړوند یوې رسمي اعلامیې له مخې، چېرته چې هغه د پاکستان له لومړي وزیر شهباز شریف سره لیدلي وو، اردوغان وویل د دغه درې اړخیز سفر موخه دا ده چې ژر تر ژره د اسلام اباد او کابل ترمنځ دایمي اوربند او سوله ټینګه شي.
د شنبې په ورځ په باکو کې د خپلې لیدنې پر مهال اردوغان وویل، تورکیه "په پاکستان کې ترهګریز بریدونه او د پاکستان او افغانستان ترمنځ کړکېچ له نږدې څاري،" او هیله یې څرګنده کړه چې د تورکیې په منځګړیتوب روانې خبرې به د دواړو هېوادونو ترمنځ د دایمي ثبات لپاره پایلې ولري.
هغه زیاته کړه چې تورکیه او پاکستان په بېلابېلو برخو، په ځانګړې توګه د سوداګرۍ، انرژۍ او دفاعي صنعت په برخو کې د همکاریو د لا پیاوړتیا لپاره کار کوي.
