د تورکیې ملي راډیو تلویزیون د ځوانانو لپاره د ( ټي آر ټي ځوان ) په نامه یو جلا چینل پرانیست. دا چینل د تورکیې د ولسمشر رجب طیب اردوغان لخوا پرانیستل شو.
د تورکیې ولسمشر اردوغان وايي،  TRT Genc  یا ټي آر ټي ځوان به  د ځوانو لیدونکو د فکري، احساساتي او کلتوري ودې د ملاتړ په موخه پراخ پروګرامونه خپاره کړي.

اردوغان د پنجشنبې په ورځ د بیشتپې ملت کانګرس او کلتور په مرکز کې ځوانانو، د رسنیو استازو او مېلمنو ته په وینا کې وویل چې هغه خوښ دی چې ځوانانو ته "د ملت په کور" کې ښه راغلاست وايي، او هغوی یې د تورکیې راتلونکی وبلل.

هغه د تورکیې د ملي راډیو تلویزیون  کارکوونکو ته مبارکي وویله او د نوي چینل د بریا هیله یې وکړه، او ویې ویل چې دا به د ځوانانو، کورنیو، د رسنیو سکتور او په ټولیز ډول د ټول ملت لپاره ګټور وي.

اردوغان وویل، TRT Genc  یا ټي آر ټي ځوان چینل به د ساینس او ټکنالوژۍ، کلتور او هنرونو، سپورت، تاریخ او روانو چارو په برخو کې پراخ پروګرامونه خپاره کړي، چې موخه به یې د ځوانو لیدونکو د فکري، احساساتي او کلتوري ودې ملاتړ وي.

هغه د داسې پلټفارمونو پر اهمیت ټینګار وکړ چې د هغه په وینا "د اعتیاد له وبا" سره مبارزه کوي، او د سکرین پر روږدي کېدو، آنلاین قمار او د نشه يي توکو پر کارولو کې د جدي زیاتوالي یادونه یې وکړه.

د "حقیقت" لپاره به مبارزه دوام ولري

ولسمشر خبرداری ورکړ چې کورنۍ د اوسنیو "کلتوري جګړو" یو له اصلي ډګرونو څخه ګرځېدلې ده، او ویې ویل چې د کورنۍ بنسټ له بې ساري فشار سره مخ دی. هغه استدلال وکړ چې ډیجیټل لوبې، چې په پیل کې د ساعت تېرۍ لپاره پیل کېږي، د یوې داسې لومې په توګه کار کولی شي چې ځوانان آنلاین قمار او شرط وهلو ته راکاږي.

اردوغان د عامه خدمتونو له اعلانونو هاخوا د یوه ډېر هوډمن چلند غوښتنه وکړه، او ویې ویل چې تورکیه باید د اعتیاد ستونزه له نږدې وڅېړي او په کلکه ورسره مقابله وکړي.

هغه زیاته کړه چې د "حقیقت" لپاره مبارزه به د انادولو اژانس او د اړیکو ریاست په ګډون د ټولو بنسټونو له لارې په ټولو جبهو کې دوام ومومي.

ځوانو لیدونکو ته د تفریح ترڅنګ زده‌کړه ورکول

په دې غونډه کې د تورکیې د ملي راډیو تلویزیون  عمومي رئیس محمد زاهد سوباجي وویل، TRT Genc  یا ټي آر ټي ځوان  هغو ځوانانو لپاره ډیزاین شوی چې د ماشومانو د پروګرامونو او د لویانو د خپرونو ترمنځ ځانونه بند احساسوي او نشي کولی یو پاک، باکیفیته چینل ومومي چې په رښتیا هم دوی ته ځانګړی وي.

هغه وویل، دا چینل به د دولت پر ډاډ، ملي ارزښتونو او کلتوري میراث ولاړ وي.

سوباجي زیاته کړه چې TRT Genc به د والدینو لپاره هم په زړه پورې وي، او یوه خوندي فضا به رامنځته کړي چې کورنۍ وکولی شي په ګډه پروګرامونه وګوري، په ګډه زده کړه وکړي او خپلې اړیکې پیاوړې کړي.

هغه وویل، د دې چینل ځانګړتیا به دا وي چې د پوهو او باکیفیته تلویزیوني شخصیتونو له لارې ځوانو لیدونکو ته د تفریح ترڅنګ زده‌کړه هم ورکړي.

هغه وویل: "د ځوانو متشبثینو د نظریاتو، د ځوانو مخترعینو د پروژو او زموږ له فضانوردانو او ساینس پوهانو سره د لیدنو په ښودلو سره، موږ به د خپلو ځوانانو لپاره بېلګې وړاندې کړو او په دوی کې به دا احساس پیاوړی کړو چې 'زه هم دا کولی شم.'"