د امریکا د  دفاع وزیر پیټ هیګسټ د پنټاګون په مشرتابه کې بدلونونه راوستي، چې له امله یې د پوځ لوی درستیز رینډي جورج تقاعد او د ټرمپ ادارې د بدلونونو پر مهال نور لوړپوړي پوځي چارواکي له دندو ګوښه شوي دي.

پنټاګون د پنجشنبې په ورځ اعلان وکړ چې جنرال رینډي اې جورج به د پوځ د ۴۱م لوی درستیز په توګه له خپلې دندې "سمدستي" تقاعد شي.

د دفاع وزارت په یوه لنډه اعلامیه کې د جورج د لسیزو پوځي خدمت مننه کړې ده.

د پنټاګون ویاند شان پارنېل په یوه اعلامیه کې وویل: "د دفاع وزارت زموږ ملت ته د جنرال جورج د لسیزو خدمتونو له امله منندوی دی. موږ ورته په تقاعد کې د ښه ژوند هیله کوو."

له دې وړاندې سي بي ایس نیوز راپور ورکړی و چې د امریکا د دفاع وزیر پیټ هیګسټ له جنرال جورج څخه غوښتي وو چې له خپلې دندې لاس واخلي او سمدستي تقاعد شي.

راپور د دې پرېکړې په اړه د باخبره سرچینو په وینا ویلي چې هیګسټ په دې چوکۍ داسې څوک غواړي چې د ولسمشر ډونالډ ټرمپ او د امریکا د پوځ لپاره د هغه لیدلوری عملي کړي.

په ۲۰۲۱-۲۰۲۲ کلونو کې د بایډن ادارې پر مهال، جورج د هغه وخت د دفاع وزیر لویډ آسټن د لوړپوړي پوځي مرستیال په توګه دنده ترسره کړې وه.

جورج د ۲۰۲۳ کال د سپتمبر په ۲۱مه د امریکا د پوځ د لوی درستیز په توګه خپله دنده پیل کړه.

د پوځ لوی درستیز معمولاً دا چوکۍ د څلورو کلونو لپاره په غاړه لري.

دوه نور جنرالان ګوښه شول

د امریکا درېیو چارواکو ویلي چې د دفاع وزیر پیټ هیګسټ د پنجشنبې په ورځ د پوځ دوه نور لوړپوړي جنرالان هم له دندو ګوښه کړل.

چارواکو هغوی تورن جنرال ویلیم ګرین جونیر، د پوځ د مذهبي امامانو مشر، او ډګر جنرال ډیویډ هوډن، چې د پوځ د بدلون او روزنې قومندانۍ مشري یې کوله، یاد کړل.

ګرین، چې یو ټاکل شوی مذهبي مشر دی، د پوځ د مذهبي امامانو د قول اردو څارنه کوله او د پوځ لوړپوړي مشرتابه ته یې د مذهبي، اخلاقي او روحیې په مسلو کې مشورې ورکولې، چې په ځواک کې د مذهبي اسانتیاوو برابرول هم په کې شامل وو.

هغه د پوځ تر ټولو لوړپوړی مذهبي مشر دی، نه جنګي قومندان.

هوډن، د پلي ځواکونو یو جنګي تجربه لرونکی افسر دی چې مخکې یې د پوځ له مهمو جنګي واحدونو څخه د څلورمې پیاده فرقې د قومندان په توګه دنده ترسره کړې او عملیاتي مشرتابه رولونه یې لوبولي، چې عراق او افغانستان ته د ځواکونو استول هم په کې شامل دي. هغه د روزنې، چمتووالي او عصري کولو په هڅو کې ښکېل و.

دا دوه رولونه د پوځ د مشرتابه جوړښت بېلابېلې برخې استازیتوب کوي: ګرین پر روحیې، اخلاقو او مذهبي ملاتړ تمرکز درلود، په داسې حال کې چې د هوډن مسؤلیتونه پر جنګي چمتووالي، بدلون او عصري کولو راڅرخېدل.

د دوی ګوښه کول نه یوازې په عملیاتي مشرتابه کې، بلکې د پوځ په بنسټیزو او کلتوري مشرتابه برخو کې هم د بدلونونو ښودنه کوي.

هیګسټ د ټرمپ د دویمې دورې پر مهال یو شمېر چارواکي له دندو ګوښه کړي دي.

تېر کال، هغه د هوايي ځواک ډګر جنرال جیفري کروز، چې د پنټاګون د دفاعي استخباراتو ادارې مشري یې کوله، وروسته له هغه ګوښه کړ چې د جون په لومړیو کې یوې ارزونې وښوده چې د ایران پر اټومي تاسیساتو د امریکا بریدونه تر هغه محدود وو چې ټرمپ ادعا کړې وه.

له دې وړاندې، هغه د سمندري ځواکونو مرستیاله اډمیراله شوشانا چټفیلډ، چې د ناټو په پوځي کمیټه کې د امریکا پوځي استازې وه، هم ګوښه کړې وه او پارنېل یې لامل "د هغې په مشرتابه د باور له لاسه ورکول" یاد کړی و.

د هیګسټ لخوا په نورو ګوښه شویو کسانو کې د وسله والو ځواکونو د لوی درستیزانو د کمیټې مشر سي کیو براون جونیر، د هوايي ځواک جنرال ټیموتي هاګ، د امریکا د سایبري قومندانۍ قومندان او د ملي امنیت ادارې (NSA) مشر، او د ساحلي ګارد قومندانه اډمیراله لینډا فاګن شامل دي.