د تورکیې ولسمشر رجب طیب اردوغان ویلي چې د باکو او ایروان ترمنځ د احتمالي سولې تړون باید د اذربایجان مشروع غوښتنې پوره کړي. دغه څرګندونې نوموړي د اذربایجان له ولسمشر الهام علی یف سره په لیدنه کې وکړې.
اردوغان د جمعې په ورځ د اقتصادي همکاریو سازمان (ECO) د سرمشریزې په څنډه کې چې د اذربایجان په خانکندي ښار کې ترسره شوه، وویل چې تورکیه د اذربایجان او ارمنستان ترمنځ د پراخې سولې خبرې اترې له نږدې څاري .دا څرګندونې د تورکیې د اړیکو ریاست په خپل رسمي ایکس حساب کې خپرې شوي دی.
ایروان او باکو د ۲۰۲۰ کال د دویمې قره باغ جګړې وروسته د سولې تړون په اړه خبرې پیل کړې. اذربایجان د ۲۰۲۳ کال په سپټمبر کې په بشپړه توګه د قره باغ پر سیمه خپل واک ټینګ کړ.
دواړو مشرانو د دوه اړخیزو اړیکو ترڅنګ د سیمه ییزو او نړیوالو موضوعاتو په اړه هم خبرې وکړې. اردوغان وویل چې د دواړو هېوادونو ترمنځ یووالی د یو مثال په توګه ولاړ دی.
د انرژۍ او ترانسپورت په برخو کې د دوه اړخیزې همکارۍ د پراختیا پر دوام ټینګار کولو سره، د تورکیې ولسمشر د ایران او اسرائیلو ترمنځ د جون ۲۴ اوربند څخه خپله خوښي څرګنده کړه او زیاته یې کړه چې په سیمه کې دایمي سولې ټینګښت د ټولو په ګټه دی.
