د ایران د ولسمشر مسعود پزشکیان دا څرګندونې په داسې حال کې کیږي چې هیواد د ۱۹۷۹ کال د اسلامي انقلاب ۴۷ کلیزه لمانځي.
د ایران ولسمشر مسعود پزشکیان ویلي چې هېواد به یې د خپل اټومي پروګرام په اړه «زیاتو غوښتنو ته سر ټیټ نه کړي»، وروسته له هغې چې تهران له متحده ایالاتو سره خبرې بیا پیل کړې دي.
هغه د چهارشنبې په ورځ دا هم وویل چې ایران د خپل اټومي پروګرام د «هر ډول تفتیش» لپاره چمتو دی او ټینګار یې وکړ چې اټومي وسله نه غواړي.
ایران او متحده ایالاتو تېره اوونۍ د تېر کال د جون له جګړې وروسته، چې له اسراییلو سره شوې وه او پکې امریکا د ایران پر اټومي تاسیساتو بریدونه کړي وو، د لومړي ځل لپاره خبرې بیا پیل کړې.
پزشکیان وویل: «زموږ ایران به د تېري پر وړاندې سر ټیټ نه کړي، خو موږ له ګاونډیو هېوادونو سره د سیمې د سولې او ارامۍ د ټینګښت لپاره په پوره ځواک خبرې اترې روانې ساتو.»
هغه دا څرګندونې د پلازمېنې تهران د ازادۍ په څلورلارې کې د ایران د اسلامي انقلاب د ۴۷مې کلیزې د نمانځنې پر مهال وکړې.
هغه زیاته کړه: «زموږ هېواد، ایران، به د هغوی زیاتو غوښتنو ته سر ټیټ نه کړي.»
ایران غواړي چې خبرې یوازې د خپل اټومي پروګرام پر موضوع متمرکزې پاتې شي، خو متحده ایالات غواړي چې د ایران د بالستیک توغندیو پروګرام او په سیمه کې د ډلو د ملاتړ موضوع هم وڅېړل شي.
ایران ټینګار کوي چې اټومي پروګرام یې سوله ییز دی، خو امریکا او د هغې متحد اسراییل باور لري چې تهران د اټومي وسلې د ترلاسه کولو هڅه کوي.
هر کال، د ایران د مشرتابه ملاتړي د هغه انقلاب د کلیزې د لمانځلو لپاره په ځواک سره راټولیږي چې په ۱۹۷۹ کې یې د امریکا ملاتړی شاه له واکه وغورځاوه.
د چهارشنبې په ورځ د ازادۍ په څلورلارې کې د اې اېف پي یو خبریال د پخوا کلونو په پرتله د امنیتي ځواکونو ډېر حضور ولید.
ایران تیره میاشت په ټول هیواد کې د لاریونونو یو غورځنګ ولید چې یو لوی کړکیچ یې رامینځته کړ، او متحده ایالاتو د لاریون کونکو د ملاتړ په موخه د پوځي اقدام ګواښ کړی و.
