د امریکا متحده ایالاتو ولسمشر ډونلډ ټرمپ د کاتسا (CAATSA) قانون په چوکاټ کې پر تورکیې د لګول شویو بندیزونو د لرې کولو په اړه مثبت پیغام ورکړ، خو کومه پرېکړه یې اعلان نه کړه.

ټرمپ د دې پوښتنې په ځواب کې چې د بندیزونو لرې کول ولې ځنډېدلي، وویل: "زه تل له ولسمشر اردوغان سره خبرې کوم. لکه څنګه چې پوهېږئ، هغه زما ملګری دی. زه غواړم تل له هغه سره خپلې اړیکې مثبتې وساتم."

ټرمپ په جولای میاشت کې په تورکیه کې د جوړې شوې ناټو سرمشریزې په څنډه کې له ولسمشر رجب طیب اردوغان سره په لیدنه کې ویلي وو، چې غواړي د کاتسا بندیزونه لرې کړي او انقرې ته د اف-۳۵  جنګي الوتکو د پېرلو د اجازې ورکولو مسله به "خامخا" په پام کې ونیسي.

امریکا په ۲۰۱۹ کال کې له روسیې څخه د تورکیې لخوا د اس-۴۰۰ (S-400) هوايي مدافعې سیستم له پېرلو وروسته، انقره د اف-۳۵ له پروګرام څخه ایستلې وه.