د اوکراین تیره شپه د روسيې د یاروسلاول سیمې پر یوه د تېلو تصفیهخونه او په روستوف-نا-دونو کې پر یوه د برېښنا سبسټېشن باندې د بی پیلوته الوتکو سره بریدونه وکړل او زیان یې ورسوه. اوکرایني چارواکو خبر ورکړی چې د کییف او اودیسا پر لور د روسيې د بریدونو له امله مرګژوبله او مالي زیانونه اوښتي دي.
د یاروسلاول سیمې والي، میخائیل یوریایف، د روسيې په ټولنیزه شبکه "مکس" کې وویل چې د هوايي دفاع سیسټمونو پر دغه سیمه ۶۵ ډرون الوتکې راپرزولي دي.
یوریایف زیاته کړه چې د برید له امله په یاروسلاول کې د تېلو په تصفیهخونه کې اور لګېدلی او زیان اوښتی دی، او د الوتکو د ټوټو لوېدو له امله د ځینو اپارتمانونو کړکیو او موټرو ته زیان رسېدلی، خو چا ته ځاني زیان نه دی اوښتی.
بلخوا د روستوف سیمې والي، یوري سلیوسار، وویل چې د ډرون ټوټو په روستوف-نا-دونو کې د برېښنا سبسټېشن زیانمن کړی، چې له امله یې د ښار په څلورو سیمو کې برېښنا جریان پرې شوی ده.
سلیوسار یادونه وکړه چې شپږ استوګنیز کورونه او ملحقات یې هم زیانمن شوي، خو د ځاني زیان راپور نه دی ورکړل شوی.
په ورته وخت کې د مسکو ښاروال، سرګي سوبیانین، وویل چې د پلازمېنې په لور روانې شپږ ډرون الوتکې راپرزول شوې دي، خو نور جزییات یې ندي ورکړي.
په اوکراین کې ډېر شمیر کسان ټپیان شوي دي
په اوکراین کې د کییف ښاروال، ویتالي کلیچکو، وویل چې د روسيې په شپنیو بریدونو د پلازمېنې په بېلابېلو سیمو کې استوګنیزو کورونو او نورو ودانیو ته زیان رسېدلی دی.
کلیچکو زیاته کړه چې په بریدونو کې ۱۶ کسان ټپیان شوي او له دغو څخه ۹ کسان روغتون ته لېږدول شوي دي.
په اودیسا کې د یوه ۱۹ پوړیز اپارتمان ۱۴م، ۱۵م او ۱۶م پوړونه زیانمن شوي او په پېښه کې د مرګژوبلې خبر ورکړل شوی دی.
دا پېښې په داسې حال کې رامنځته کېږي چې دواړه لوري د یو بل پر زېربناو او نورو موخو د ډرون بریدونو ته دوام ورکوي.
