د "ګلوبل صمود فلوټیلا" فعالان د تورکیې استانبول ښار ته راورسېدل
۱۳۷ فعالان، چې ۳۶ یې د تورکیې وګړي دي، وروسته له هغه چې د اسرائیلو له خوا په ناقانونه توګه غزې ته له تلونکي "ګلوبل صمود فلوټیلا" کاروان څخه ونیول شول، په یوه ځانګړې الوتنه کې استانبول ته راورسېدل.
هغه الوتکه چې د "ګلوبل صمود فلوټیلا" فعالان یې لېږدول، چې د اسرائیلو له خوا په نړیوالو اوبو کې نیول شوي وو، د اسرائیلو په ایلات ښار کې له رامون هوايي ډګر څخه روانه او د شنبې په ورځ استانبول ته راورسېده.
تورکي چارواکو په استانبول کې د "ګلوبل صمود فلوټیلا" د فعالانو هرکلی وکړ.
د تورکیې د بهرنیو چارو وزیر هاکان فیدان د فعالانو هرکلی وکړ او د هغوی زړورتیا او هوډ یې وستایه.
هغه د پاتې تورکي وګړو د ژر تر ژره راستنېدو د ډاډمنولو لپاره پر روانو هڅو ټینګار وکړ.
فیدان په ګوته کړه چې دغو زړورو کسانو د ظلم پر وړاندې یو باعزته دریځ غوره کړی او د عدالت او بشري ارزښتونو لپاره د خپلې مبارزې له لارې د مظلومانو غږ ګرځېدلي دي.
د انادولو اژانس د معلوماتو له مخې، فعالانو د خپلو اداري چارو له بشپړولو وروسته، په هغې الوتکه کې سپاره شول چې له غرمې مخکې په رامون هوايي ډګر کې کېناسته او وروسته یې د استانبول پر لور الوتنه وکړه.
په الوتکه کې د "ګلوبل صمود فلوټیلا" ۱۳۷ غړي سپاره وو، چې ۳۶ یې تورکي وګړي وو.
د تورکيې ديپلوماتیکو سرچینو په وینا، په الوتکه کې د ۱۲ نورو هېوادونو وګړي هم سپاره وو، چې په کې د امریکا، متحده عربي اماراتو، الجزایر، مراکش، ایټالیا، کویټ، لیبیا، مالیزیا، موریتانیا، سویس، تونس او اردن اتباع شامل دي.
یوه تورکي فعال له ټي آر ټي ورلډ سره په خبرو کې وویل چې د نیول کېدو پر مهال د اسرائیلي چارواکو له خوا له دوی سره غیر انساني چلند شوی دی. هغه زیاته کړه، دوی ته د دریو ورځو لپاره اوبه او خواړه نه دي ورکړل شوي او حتی د لمانځه اجازه یې هم نه درلوده.
