د وینزویلا ولسمشر مادورو: "موږ نوی ویتنام نه غواړو"

د وینزویلا ولسمشر نیکولاس مادورو وویل چې هیواد یې له ۲۵ اونیو راهیسې د امریکا تر پوځي محاصرې لاندې دی او زیاته یې کړه، "موږ نوی ویتنام نه غواړو."**

مادورو د پلازمینې کاراکاس د کارګرانو په بنسټ ایښودونکې غونډه کې په خپله وینا کې، په کارابین کې د امریکا پر پوځي خوځښتونو او د وینزویلا د تیلو د ټانکر پر نیولو نیوکه وکړه.

مادورو ادعا وکړه چې امریکا غواړي په بېلابېلو پلمو وینزویلا د لیبیا، افغانستان او عراق په څیر برخلیک سره مخ کړي او ویې ویل: "موږ نوی ویتنام نه غواړو. وینزویلا له ۲۵ اونیو راهیسې له دې پوځي محاصرې څخه شکایت کوي، مبارزه کوي او دوی ته ماتې ورکوي. موږ تر یو څو اړخیز برید لاندې یو، خو د وینزویلا خلکو وښودله چې څومره پیاوړي او غښتلي دي."

مادورو د امریکا حکومت د "سمندري غلا" په کولو تورن کړ او زیاته یې کړه:

"د کارابین او وینزویلا د سولې دفاع په حقیقت کې د ټولې نړۍ د سولې دفاع ده. موږ د سمندري ترانسپورت په برخه کې له ټولو کارکوونکو غوښتنه کوو چې نړیوال اقدام وکړي. زموږ موخه یوازې د وینزویلا نه، بلکې د ټولې نړۍ د سوداګرۍ د ازادۍ دفاع ده. موږ باید د هغو کسانو پر وړاندې مبارزه وکړو چې ځانونه د سمندري غلا کولو واکمن ګڼي."

مادورو دې ته په اشارې چې امریکا په ازادو اوبو کې د وینزویلا د تیلو ټانکر نیولی، وویل چې کښتۍ ۱.۹ میلیونه بېرله تېل لېږدول چې له وینزویلا څخه اخیستل شوي وو، او دا یو ښکاره "سمندري غلا" ده.

مادورو څرګنده کړه چې تل د خپلو کارګرانو ترڅنګ ولاړ دی او ویې ویل: "ما په دې ژوند کې نه سوداګر او نه هم ملیاردر وم، نه یم او نه غواړم چې وم، زه یوازې یو عادي کارګر او یو عادي انسان یم. نن موږ له هر وخت څخه ډیر پیاوړي یو، نن زموږ خلک له هر وخت څخه ډیر باخبره دي."

مادورو د ډسمبر په ۱۲مه په خپله یوه وینا کې، د هیواد په سواحلو کې د امریکا له خوا د تیلو د ټانکر نیول د "کارابین سمندري غلو" ته ورته بللي وو او ویلي یې وو چې "د دوی ماسکونه په رسمي توګه لوېدلي دي."

 د امریکا ولسمشر ډونالډ ټرمپ د ډسمبر په ۱۱مه اعلان کړی و چې دوی د وینزویلا په سواحلو کې د تیلو یو ټانکر نیولی دی. ولسمشر ټرمپ ویلي وو چې ټانکر یې "په یو ښه دلیل" نیولی او له ځان سره به یې وساتي. ټرمپ په خپلو پخوانیو ویناوو کې ویلي وو چې ممکن پر وینزویلا ځمکني بریدونه وکړي او دا بریدونه به "ډیر ژر" پیل شي.

د وینزویلا چارواکو بیا د امریکا له خوا د تیلو د ټانکر نیول "ښکاره غلا" بللې او ویلي یې دي چې دا موضوع به نړیوالو ادارو ته وړاندې کړي.