د هند د تامیل ناډو ایالت په کرور ښار کې، د مشهور اداکار او د TVK ګوند د مشر جوزف ویجي چندراشیکر په غونډه کې د ګڼې ګوڼې له امله ټېل ماټېل رامنځته شو. په دغه ټېل ماټېل کې، چې په یو داسې ځای کې رامنځته شو چې شاوخوا ۱۲۰ زره کسانو ورته د ننوتلو هڅه کوله خو یوازې د ۱۰ زره کسانو ظرفیت یې درلود، لږ تر لږه ۳۹ کسان مړه او ۵۱ نور ټپیان شول.

عیني شاهدانو ویلي، تمه وه چې ویجي د غرمې پر مهال غونډې ته راشي، خو د هغه په راتګ کې لږ تر لږه شپږ ساعته ځنډ راغی. د شاهدانو د څرګندونو له مخې، د ویجي انتظار پر مهال ګڼه ګوڼه مخ په ډېرېدو وه، او کله چې هغه خپله وینا پیل کړه، وضعیت لا نور هم کړکېچن شو. ویل شوي چې په ګڼه ګوڼه کې د وېرې خپرېدو او د هوا د ګرمۍ له امله د ماشومانو په ګډون د ډېرو کسانو روغتیايي حالت خراب شو. کله چې ویجي د وضعیت پر جديوالي پوه شو، خپله وینا یې نیمګړې پرېښوده، پر ګڼې ګوڼې یې د ارام پاتې کېدو غږ وکړ او له سیمې څخه ووت.

لومړي وزیر مودي له کورنیو سره خواخوږي څرګنده کړه

د هند لومړي وزیر نریندرا مودي پر خپله ټولنیزه شبکه په یوه بیان کې ویلي: "د تامیل ناډو په کرور ښار کې د سیاسي غونډې پر مهال رامنځته شوې غمجنه پېښه د ژور خفګان لامل ده. د هغو کسانو کورنیو ته چې خپل ژوند یې له لاسه ورکړی، د خپلې ژورې خواخوږۍ مراتب وړاندې کوم."