پلان شوې غونډه د واشنګټن او بیجینګ لخوا د نړۍ د دوو لویو اقتصادونو ترمنځ د کړکیچونو د مدیریت لپاره د تازه هڅو نښه ده.
د امریکا ولسمشر ډونالډ ټرمپ ویلي چې هغه به د روان کال په وروستیو کې په سپینه ماڼۍ کې د چین د مشر شي جین پینګ کوربه توب وکړي، ځکه چې د نړۍ دوه ستر اقتصادونه هڅه کوي هغه اړیکې بیا سمې کړي چې د سختې سوداګریزې جګړې له امله خرابې شوې دي.
ټرمپ دا تبصره د چهارشنبې په ورځ د (NBC News) سره په یوه مرکه کې وکړې - په هماغه ورځ چې هغه او شي د سوداګرۍ، تایوان، اوکراین جګړې او د ایران د وضعیت په اړه پراخې خبرې اترې درلودې.
ټرمپ تمه لري چې د اپرېل په میاشت کې چین ته سفر وکړي، له هغې وروسته به شي متحده ایالاتو ته سفر وکړي.
ټرمپ په مرکه کې وویل: "هغه د کال په پای کې سپینې ماڼۍ ته راځي،" چې ځینې برخې یې د یکشنبې په ورځ خپرې شوې.
هغه وویل: «دا د نړۍ دوه تر ټولو ځواکمن هېوادونه دي، او موږ ډېرې ښې اړیکې لرو.»
له هغه راهیسې چې ټرمپ یو کال وړاندې بیا سپینې ماڼۍ ته راستون شو، هغه د تعرفو د پراخ کاروونکي په توګه پېژندل شوی، او پر فولادو، موټرو او نورو توکو د سکتوري تعرفو تر څنګ یې د بېلابېلو پالیسۍ موخو د ترلاسه کولو لپاره پراخ اقدامات هم اعلان کړي دي.
سپینې ماڼۍ د سوداګرۍ په برخه کې له بیجینګ سره سیالي کړې خو د تیر پسرلي له لویې شخړې وروسته له چین سره پراخه اوربند ته ورسیده.
سره له دې چې متحده ایالاتو داسې ګامونه پورته کړي چې پر چینایي تولیداتو خپله تکیه کمه کړي، دواړه هیوادونه په اقتصادي لحاظ ژورې اړیکې لري.
شي، چې وروستی ځل په ۲۰۲۳ کال کې متحده ایالاتو ته تللی و، د چهارشنبې په ورځ ټرمپ ته خبرداری ورکړ چې پر خپلواکه تایوان — چې چین یې د خپلې خاورې برخه ګڼي — د وسلو د پلور په اړه «له احتیاطه کار واخلي».
د چین مشر هم هیله څرګنده کړه چې د دواړو هېوادونو ترمنځ دوه اړخیزې ستونزې، د سوداګرۍ په ګډون، د بېجینګ او واشنګټن ترمنځ په دوستانه ډول حل شي.
د دولتي تلویزیون (CCTV) په وینا، شي وویل: «د ستونزو د یو په یو مسلو حل کولو او په دوامداره توګه د متقابل باور رامینځته کولو سره، موږ کولی شو د دواړو هېوادونو د یوځای کېدو لپاره سمه لاره ومومو.»
بل لور ته، ټرمپ وویل چې له شي سره خبرې «عالي» وې او «موږ دواړه پوهېږو چې دا مهمه ده چې همداسې یې وساتو.»
د جمعې په ورځ، متحده ایالاتو د روسیې او چین سره د درې اړخیزو خبرو اترو غوښتنه وکړه ترڅو د اټومي وسلو په اړه نوي محدودیتونه وټاکي، مګر بیجینګ تر دې دمه "په دې مرحله کې" د بې وسلې کولو په خبرو اترو کې ګډون رد کړی دی.
